Потрошувачката на гориво не зависи само од цената на бензинските пумпи, туку и од начинот на кој возиме. Кај автомобилите со мануелен менувач, една навика што многу возачи ја прават погрешно може непотребно да го оптоварува моторот и да ја зголемува потрошувачката: предолго возење во ниска брзина.
Германскиот TÜV советува при забрзување што порано да се префрла во повисок степен на пренос, а при забавување подоцна да се враќа во понизок. Најдобро е моторот да работи меѓу 1.500 и 2.500 вртежи во минута, бидејќи тогаш потрошувачката е најниска, а моторот работи потивко и порамномерно.
Не газете до крај при тргнување
При тргнување, папучката за гас не треба да се притиска до крај. Стручњаците советуваат да се користи околу две третини од одот на гасот, доволно за автомобилот да забрза стабилно, но без непотребно „мачeње“ на моторот.
Откако ќе се достигне саканата брзина, најважно е таа да се одржува што е можно поконстантно. Честото забрзување и нагло кочење се меѓу најголемите непријатели на економичното возење.
Гасот пуштете го навреме, кочете помалку нагло
За дополнителна заштеда, се препорачува возачите навреме да го пуштат гасот кога се приближуваат кон семафор, крстосница или застој. Наместо до последен момент да се вози со гас, па нагло да се кочи, подобро е автомобилот постепено да забавува.
На подолги делници, темпоматот може да помогне во одржување рамномерна брзина, особено на автопат. Но, во густ сообраќај не е особено корисен ако автомобилот нема адаптивна функција што самостојно ја прилагодува брзината според возилата пред него.
И товарот во автомобилот има цена
Дополнителната тежина исто така ја зголемува потрошувачката. Според TÜV, само 50 килограми непотребен товар во автомобилот може да ја зголемат потрошувачката до 0,3 литри на 100 километри.
Затоа багажникот не треба да биде подвижен магацин. Сè што не ви треба секојдневно, подобро е да остане дома, не во автомобилот. Малите навики зад воланот можеби не изгледаат драматично, но на крајот од месецот можат да направат разлика и во потрошеното гориво и во паричникот.
