Фјучерсите на американските акции утрово забележаа благ пад, откако главните берзански индекси ослабнаа, а акциите на „Енвидија“ паднаа по заминувањето на нејзиниот основач и извршен директор Џенсен Хуанг, во услови на актуелниот скандал што ја потресе компанијата.

Фјучерсите поврзани со индексот Дау Џонс Индастријал Авејџ беа во благ минус, додека оние на СиПи 500 ослабнаа за 0,12 отсто. Фјучерсите на Насдак-100 паднаа за 0,38 отсто.

Ова следува откако Насдак Композит и СиПи 500 во редовното тргување забележаа пад од околу 0,4 отсто. Дау Џонс изгуби речиси 190 поени, односно 0,4 отсто. Акциите на „Енвидија“ паднаа за 4,3 отсто, повлекувајќи ги надолу сите три главни берзански индекси, иако производителот на чипови ја заврши трговската сесија над дневниот минимум.

И на азиско-пацифичките пазари преовладуваше негативно расположение. Јужнокорејскиот Коспи ослабна за 0,85 отсто, хонконшкиот Ханг Сенг падна за 1,4 отсто, а кинескиот ЦСИ 300 забележа пад од 0,66 отсто. Јапонскиот Никеи 225 се движеше спротивно на трендот и порасна за 0,53 отсто, додека австралискиот СиПи/ЕјЕјЕкс 200 ослабна за 0,62 отсто.

Скандалот и заминувањето на Џенсен Хуанг ја потресоа „Енвидија“

Во четвртокот Џенсен Хуанг поднесе оставка од функцијата во компанијата за производство на чипови, по извештаите за негови наводни љубовни афери надвор од бракот, меѓу кои и врска со жена за која американски разузнавачки претставници веруваат дека е кинеска шпионка. Аналитичари за Си-Ен-Би-Си изјавиле дека заминувањето на Хуанг би можело да предизвика корекција на цената на акциите на „Енвидија“ од дури 20 отсто.

Финансиската директорка на компанијата, Колет Крес, која работи во „Енвидија“ повеќе од една деценија, ќе ја води компанијата како вршител на должноста извршен директор. Управниот одбор бара трајна замена за Хуанг, и во рамките на компанијата и надвор од неа.

Нафтата поскапе поради тензиите околу Иран

Растот на цените на нафтата во четвртокот дополнително ги држеше акциите под притисок. Северноморската нафта Брент поскапе за повеќе од три отсто во текот на денот, а тргувањето го заврши со цена од 95,82 долари за барел. Поскапувањето следуваше по објавата на американскиот претседател Доналд Трамп на социјалната мрежа Трут соушл, во која порача: „Не ни треба договор со Иран“.

Неговата изјава ги засили стравувањата дека војната меѓу САД и Иран би можела дополнително да се продолжи, што би значело и продолжување на неизвесноста на енергетските пазари.

Инвеститорите ги очекуваат податоците за инфлацијата

Нов важен сигнал за пазарите се очекува денеска, со објавувањето на извештајот за индексот на производствени цени (ППИ) за октомври, кој ја мери инфлацијата на големо.

Економистите анкетирани од Дау Џонс прогнозираат дека вкупниот индекс ќе порасне за 0,4 отсто на месечно ниво и за 6,6 отсто во споредба со истиот период минатата година. И покрај најновите турбуленции, главните берзански индекси сè уште се во значителен плус на неделно ниво. Насдак е во добивка од 3,2 отсто, СиПи 500 бележи раст од 2,9 отсто, а Дау Џонс е на пат да порасне за речиси два отсто.

Доколку овие движења се задржат до крајот на неделата, трите индекси ќе ги забележат најдобрите неделни резултати од почетокот на август.