Грција најавува мерки за помалку хаос на Евзони пред летната туристичка сезона, откако новиот европски систем за биометриска проверка почна да создава подолги редици на граничните премини. За македонските граѓани ова е најважната точка кон морето, а прашањето е едноставно: ќе се скрати ли конечно чекањето или Евзони повторно ќе стане летно тесно грло?
Грчките власти одржале работна средба во Солун, на иницијатива на заменик-министерот за внатрешни работи надлежен за Македонија и Тракија, Констандинос Гулекас. На состанокот учествувале претставници на полицијата, царината, локалната самоуправа и регионалните служби, со цел да се најдат брзи решенија за намалување на редиците.
Проблемот се појави по примената на новиот европски Entry/Exit System, кој предвидува биометриска обработка на патниците од земји што не се членки на Европската Унија. Наместо само класична проверка на документите, системот бара дополнителна обработка, што на терен значи повеќе време по патник и поголем притисок врз најфреквентните премини.
Евзони повторно е главната точка за македонските патници
За граѓаните од Македонија, Евзони е преминот што секое лето станува главна порта кон грчките туристички дестинации. Токму таму грчките служби треба да утврдат како може да се забрза протокот, без да се нарушат правилата за безбедносна и биометриска контрола.
Грција најавува зајакнување на службите на терен, подобрување на информатичките системи и можни привремени технички решенија на граничната инфраструктура. Специјални тимови треба да ги посетат Евзони и Кипи и да предложат мерки што може брзо да се применат пред најголемиот летен наплив.
Гулекас нагласил дека туристичкиот и трговскиот сообраќај кон Грција постојано расте, но дека земјата мора да ги спроведува европските правила. Грчкиот министер за заштита на граѓаните, Михалис Хрисохоидис, претходно посочил дека за застојот имало реакции и од Северна Македонија и од Србија.
Со ова, Атина практично признава дека границата може да стане тесно грло уште пред стартот на сезоната. За патниците од Македонија, најавените мерки значат надеж дека патот кон море ќе биде побрз, но и предупредување дека летните гужви ќе зависат од тоа колку брзо грчките власти ќе го приспособат новиот систем на реалниот сообраќаен притисок.
