Пол Макартни официјално влезе во редот на светските милијардери со нето вредност проценета на 1,4 милијарди долари. Според најновата анализа на списанието „Форбс“, 84-годишниот поранешен член на легендарните „Битлси“ стана третиот најбогат музичар во светот, позиционирајќи се веднаш зад Џеј-Зи и Тејлор Свифт. Растот на неговото богатство се должи на децениското паметно управување со авторските права, глобалните турнеи и вредната приватна уметничка колекција.

Главниот столб на финансиската империја на Макартни е издавачката куќа „МПЛ комјуникејшнс“ (MPL Communications), основана во 1969 година. Компанијата управува не само со неговиот личен опус, туку и со каталози на други автори. Меѓу нив се авторските права за опусот на Бади Холи, партитури од бродвејски мјузикли и божиќни класици како „It’s Beginning to Look a Lot Like Christmas“.

Овие аквизиции денес вредат речиси четвртина милијарда долари. Секојпат кога некое училиште ја поставува претставата „Брилијантин“ или корисник на стриминг платформите ја пушта „Blue Suede Shoes“, одреден процент оди директно на сметката на британскиот музичар.

Како поранешен член на највлијателниот бенд во поп-историјата, Макартни поседува 25 отсто од компанијата „Епл корпс“ (Apple Corps). Овој холдинг годишно генерира околу 50 милиони долари од стриминг ренти, продажба на винили и лиценцирани производи.

Покрај тоа, Макартни добива околу 10 милиони долари годишно директно од авторските права за песните на бендот. Тоа е право за кое водеше долгогодишни правни битки пред судовите во Соединетите Американски Држави и Велика Британија. „Форбс“ вредноста на овие права ја проценува на 200 милиони долари.

Проценката на богатството опфаќа и огромни приходи од настапи во живо, вклучувајќи ги 79-те концерти од турнејата „Got Back“, недвижности низ светот и уметнички слики од Пикасо и Магрит. Макартни останува продуктивен и на 84-годишна возраст. Во мај го издаде албумот „The Boys of Dungeon Lane“, настапи во финалето на шоуто „Saturday Night Live“, а летово беше прикажан и документарниот филм „Man on the Run“ на режисерот Морган Невил.