Голем шумски пожар североисточно од Мадрид продолжува да се шири и покрај огромните напори на пожарникарите и воздухопловните сили. Огнената стихија досега зафатила околу 13.000 хектари, а властите сè уште не успеваат целосно да ја стават под контрола. Пожарот избувнал во четвртокот, а во текот на ноќта огнената линија напредувала за дополнителни 14 километри, објави шпанската јавна телевизија RTVE.

Над 500 луѓе на терен, помагаат и 25 канадери

Во гаснењето учествуваат повеќе од 500 пожарникари и припадници на итните служби, кои работат на создавање противпожарни појаси и спречување на понатамошно ширење на огнот. На копнените сили им помагаат и 25 авиони-канадери, ангажирани во воздушно гаснење.

Министерката за заштита на животната средина на регионот, Мерседес Гомес, изјави дека превентивно биле евакуирани 20 општини со околу 800 жители. Според властите, пожарот засега се држи подалеку од населените места.

Сушата ја влошува ситуацијата

Ширењето на пожарот го олеснуваат тешките временски услови – долготрајната суша и ниската влажност на воздухот. Голем дел од Шпанија е под висок ризик од шумски пожари, а бројките покажуваат дека ситуацијата годинава е особено сериозна.

Според Европскиот информативен систем за шумски пожари (EFFIS), од почетокот на 2026 година во Шпанија изгореле повеќе од 80.000 хектари шума, што е речиси двојно повеќе во споредба со истиот период минатата година.

Властите предупредуваат дека високите температури, сувата вегетација и неповолните временски услови може дополнително да ја отежнат борбата со огнената стихија во следните денови.