алестинскиот претседател Махмуд Абас со декрет го одреди 28 ноември 2026 година како датум за одржување на парламентарните избори, кои ќе бидат први во последните 20 години. Според палестинската новинска агенција, право на глас ќе имаат Палестинците од Западниот Брег, Источен Ерусалим и Појасот Газа.

Последните парламентарни избори се одржаа во јануари 2006 година, кога Хамас освои мнозинство во Палестинскиот законодавен совет. Една година подоцна, по судирите со движењето Фатах, Хамас ја презеде контролата врз Појасот Газа, што доведе до долготрајна политичка блокада. Парламентот подоцна беше распуштен од страна на Палестинскиот уставен суд во 2018 година.

Сѐ уште е неизвесно дали изборите ќе се одржат според најавениот план. Дополнителен предизвик претставува статусот на Источен Ерусалим, кој Израел го смета за дел од својот главен град и не дозволува официјални политички активности на Палестинската самоуправа во градот. Во меѓувреме, Хамас останува доминантна политичка сила во Појасот Газа и по завршувањето на војната со Израел.

Претседателските избори, кои исто така со години се одложуваат, се очекува да бидат организирани во првото тримесечје од 2027 година. Махмуд Абас, кој има 90 години, беше избран за претседател во 2005 година, а неговиот четиригодишен мандат формално истече во 2009 година. Оттогаш изборите неколкупати беа одложувани или откажувани.