Американската Централна команда, CENTCOM, денеска соопшти дека два трговски брода со американско знаме успешно поминале низ Ормускиот Теснец.
Според CENTCOM, разурнувачи со наведувани ракети на американската морнарица оперираат во Персискиот Залив, откако поминале низ теснецот.
„Американските сили активно помагаат во напорите за повторно воспоставување на транзитот за трговските бродови“, се наведува во соопштението.
CENTCOM не ги објави имињата на бродовите за кои тврди дека успешно пловеле низ Ормускиот Теснец.
Соопштението доаѓа откако Иран претходно тврдеше дека со две ракети нападнал американски брод во теснецот, но САД го негираа тоа.
Во меѓувреме, Обединетите Арапски Емирати соопштија дека во понеделник Иран нападнал брод во Ормускиот Теснец.
Инцидентите во овој поморски правец дополнително ја зголемуваат загриженоста за безбедноста на трговскиот сообраќај, бидејќи низ Ормускиот Теснец минува значаен дел од светската испорака на нафта и гас.
