Десетици летови денеска се откажани на аеродромот Схипхол во Амстердам поради силните ветрови што ги донесе невремето „Боело“. Во делови од Холандија и понатаму е на сила жолто метеоролошко предупредување.

Откажани се бројни летови на авиокомпаниите КЛМ, Луфтханза и Изиџет, бидејќи силниот ветер го оневозможува користењето на некои од аеродромските писти, пренесува „НЛ тајмс“. „Авиокомпаниите ги приспособуваат распоредите на летови. Патниците треба да очекуваат откажувања и доцнења“, изјави портпарол на аеродромот Схипхол.

Патниците што треба да патуваат од или до Амстердам се советуваат да ги проверат информациите за својот лет кај авиокомпанијата и на официјалната страница на аеродромот пред да тргнат кон аеродромот.