Во таканаречениот Ќациленд, шаторскиот камп во Пионерскиот парк во Белград, денес повторно се поставуваат шатори и придружна опрема, објави српскиот портал Nova.rs, повикувајќи се на информациите на порталот Машина.

На објавените снимки се гледаат камиони што носат опрема во паркот, кој и натаму е ограден. На местото е присутна и полицијата.

U Pionirskom parku ponovo se postavljaju šatori i propratne instalacije, a park je i dalje ograđen ogradama. Policija prisutna. https://t.co/XQGKZjH8Tj

— Mašina (@MasinaRS) October 25, 2026

Истовремено, во центарот на Белград е значително засилено полициското присуство. Според Nova.rs, полицијата влегла во зградите на Народното собрание и на Собранието на град Белград.

Забележани се и полициски возила наменети за разбивање демонстрации, кои се движеле од улицата „Кнез Милош“ кон улицата „Крал Милан“, додека колона возила на Жандармеријата била снимена на автопатот.

Овие активности се случуваат на денот на парламентарните избори во Србија, на кои е регистрирана исклучително висока излезност. Според ЦеСИД, до 17 часот гласале 60,9 отсто од избирачите, со што веќе е надмината конечната излезност од изборите во 2023 година.

Ќациленд, кој беше формиран како камп на противниците на студентските блокади, во изминатиот период стана еден од најпрепознатливите симболи на организираниот одговор на власта на студентското протестно движење.

Засега нема официјално објаснување дали повторното поставување шатори и засиленото полициско присуство се поврзани со можни собири по објавувањето на изборните резултати.