Италијанската полиција приведе 271 лице за време на немирите во Милано во неделата , потврдија властите. Ова беше втор ден од протестите против лошите јавни услуги и зголемувањето на трошоците за живот, обележани со судири со полицијата, грабежи на продавници и уништување на имот, објави Ројтерс .

Полицијата за немири употреби солзавец и водни топови против неколку стотици маскирани демонстранти кои палеа канти за отпадоци и ограбуваа продавници во центарот на градот. Според телевизиските снимки, биле ограбени продавниците за спортска опрема „Декатлон“ и „Арктерикс“ и филијалата на „Водафон“.

Од приведените, уапсени се 32 лица, објави полицијата во понеделник. Меѓу уапсените се 23 малолетници и 13 странски државјани. Поднесени се обвиненија против уште 28 лица.

Немири и во други градови

Немирите во Милано следат по слични судири што избувнаа во саботата во неколку северни градови, вклучувајќи ги Болоња, Бреша, Бергамо и Торино. Полицијата во извештај објавен во неделата соопшти дека се уапсени 28 демонстранти.

Ситуацијата во Италија потсетува на онаа во соседна Франција, каде што стотици илјади луѓе излегоа на улиците во саботата. Протестите таму, предизвикани од зголемувањето на трошоците за живот и влошувањето на јавните услуги, беа меѓу најнасилните во последните години.

Италијанската премиерка Џорџија Мелони го осуди насилството и најави дека владата, која се соочува со избори следната година, ќе одржи состанок во понеделник на кој ќе разговара за одговорот на ситуацијата.