Пожарникарите денес се борат со огромни шумски пожари во делови од Шпанија и Франција, со многу висок ризик од нови пожари низ поголемиот дел од Шпанија, иако големиот пожар што беснееше низ централната покраина Гвадалахара постепено се повлекува, дозволувајќи им на жителите да се вратат дома.

Двајца пожарникари загинаа во Франција

Двајца пожарникари загинаа во регионот Жиронд во Франција во вторник кога нивното противпожарно возило се запали. Властите ги повикаа жителите и туристите да не користат скари во областите погодени од топлотниот бран, истакнувајќи дека дури девет од десет, или 90 проценти, од пожарите започнуваат – случајно или не – како резултат на човечка активност.

Во најлошиот шумски пожар што досега ја погодил Шпанија, регионот Гвадалахара изгоре околу 32.000 хектари. Ситуацијата почна да се стабилизира во вторник откако жителите на 34 општини беа принудени да се евакуираат, а пристапот беше ограничен на жителите на уште 14.

Шпанската метеоролошка агенција AEMET објави дека ризикот од шумски пожари останува „многу висок или екстремен“ во поголемиот дел од континентална Шпанија и Балеарските Острови, и дека се очекува поголема опасност во наредните денови.

Во Франција, малку пониските температури и послабите ветрови им помогнаа на пожарникарите да се справат со шумскиот пожар што опустоши 2.500 хектари во југоисточниот регион Вар, оштетувајќи десетици домови и принудувајќи 400 луѓе да ги напуштат своите домови, соопштија локалните власти.

Во 7 часот утрово, хеликоптерите сè уште испуштаа вода врз шумскиот пожар во Вар, бидејќи тој е сè уште активен.

„Ситуацијата беше многу сериозна, околу 1.100 пожарникари се бореа со пожарот цела ноќ“, изјави командантот Вилијам Вогл, портпарол на пожарникарите од Вара, за радиото RMC.

Пожарот сè уште не е локализиран, но ветерот би требало да биде поповолен во среда, рече тој.

Уште еден пожар беснееше во Високите Алпи на југоистокот од земјата, во живописниот француски департман кој се наоѓа во регионот Прованса-Алпи-Азурен Брег.

Големи пожари и на Сицилија, пожарот се заканува на клиника и фабрика за огномет

Десетици пожари избувнаа на Сицилија, каде пожарникарите и цивилната заштита се обидуваат да ги локализираат пожарите што им се закануваат на населбите, руралните области и патиштата.

Најкритичното подрачје е околу Агриџенто, каде што голем пожар, донесен од силен јужен ветер, стигна до градот Санто Стефано Кискина. Повеќе од 100 луѓе се евакуирани од своите домови како мерка на претпазливост.

Италијанските медиуми јавуваат дека пожарникарите се обидуваат да заштитат објект за складирање кислород, клиниката „Игнацио Атарди“, бензинска пумпа и фабрика за огномет. На местото на настанот се испратени и засилувања од карабинерите и полицијата.

Градоначалникот Франческо Качаторе ја опиша ситуацијата како драматична и ги повика жителите на областите Канфуто и Боско веднаш да ги напуштат своите домови.

Државниот пат SS118 Корлеонезе Агриџентина во близина на Санто Стефано Кискина е привремено затворен поради пожар.