Европската комисија донесе прелиминарен заклучок дека пазарните гиганти „Амазон веб сервисис“ (Amazon Web Services) и „Мајкрософт Ажур“ (Microsoft Azure) мора да потпаднат под строгите правила на Европската унија за дигитална доминација. Овој стратешки потег за првпат ја проширува најмоќната европска технолошка регулатива директно врз инфраструктурата во компјутерскиот облак (cloud). Одлуката, која доаѓа по деталното истражување на пазарот започнато во ноември минатата година, означува официјално проширување на Законот за дигитални пазари на европскиот пазар за клауд-услуги, чија вредност се проценува на неверојатни 220 милијарди евра. Досега оваа регулатива ги покриваше само платформите насочени директно кон потрошувачите, како што се продавниците за апликации и интернет-пребарувачите.
Двете компании ќе имаат можност во наредниот период да ги претстават своите аргументи против ваквата одлука пред Комисијата да ја донесе конечното решение во управната постапка, која треба да заврши до декември годинава. Доколку ја добијат официјалната ознака „чувари на портата“ (gatekeepers), компаниите ќе бидат законски обврзани драстично да го олеснат и поевтинат процесот со кој корисниците би преминале кај конкурентски даватели на услуги. Исто така, тие ќе мора да дозволат комбинирано користење на повеќе различни платформи и целосно да се откажат од деловните практики кои регулаторите ги сметаат за нефер и монополски. Европската комисија истовремено спроведува и дополнителна постапка за да утврди дали постојните законски правила, главно дизајнирани за крајните потрошувачи, се соодветни за специфичниот пазар на компјутерски облаци, а конкретните препораки за ова се очекуваат до мај 2027 година.
Очекувано, двата технолошки гиганти остро се спротивставија на ваквиот развој на настаните. Од компанијата „Амазон“ уште на почетокот на јуни реагираа со став дека оваа регулатива едноставно не е дизајнирана за специфичен пазар каков што е клаудот. Од друга страна, менаџментот на „Мајкрософт“ изрази сериозна загриженост поради фактот што нивниот голем конкурент „Гугл клауд“ (Google Cloud) воопшто не е опфатен со оваа прелиминарна одлука на Европската комисија.
