Четвртфиналната програма на Светското првенство 2026 продолжува со дуелот меѓу Норвешка и Англија, кој се игра вечерва од 23:00 часот во Мајами. Норвежаните на овој турнир веќе покажаа дека можат да се носат со најсилните репрезентации, а предводени од својата најголема ѕвезда Ерлинг Халанд ќе се обидат да направат уште еден голем чекор во историјата.

Англија, пак, влегува во мечот со големи амбиции и желба да остане во трката за трофејот, но и со одредени кадровски проблеми. Џордан Хендерсон нема да може да настапи откако заработи скршеница на подлактицата при прославата на победата во претходниот натпревар.

Капитенот Хари Кејн пред дуелот откри и дека пред 18 месеци играл голф со американскиот претседател Доналд Трамп, искуство кое го опиша како „уникатно“.

Аргентина – Швајцарија: Швајцарците ослабени пред големиот дуел

Последниот четвртфинален натпревар носи пресметка меѓу Аргентина и Швајцарија, која се игра во ноќта меѓу сабота и недела од 03:00 часот во Канзас Сити. Швајцарија ќе биде без еден од своите најважни фудбалери – 20-годишниот Јохан Манзамби, кој сè уште не се опоравил од повредата на коленото.

Манзамби беше најдобар швајцарски стрелец на турнирот со три гола и две асистенции, и неговото отсуство претставува сериозен удар за тимот на селекторот Мурат Јакин. Аргентина, актуелниот светски шампион, во четвртфиналето влегува како фаворит, но Швајцарија веќе покажа дека може да биде опасен противник.

Шпанија прва обезбеди полуфинале

Во првиот завршен четвртфинален дуел, Шпанија ја совлада Белгија со 2:1 и обезбеди место меѓу четирите најдобри селекции.

„Црвената фурија“ во полуфиналето ќе игра против Франција, која претходно го елиминираше Мароко со 2:0.

Херој на Шпанија беше Микел Мерино, кој влезе од клупата во 86. минута и само две минути подоцна го постигна победничкиот гол.

„Две натпревари нè делат од титулата. Две натпревари до нашиот сон“, изјави Мерино по пласманот во полуфиналето.

Полуфинални парови на повидок

Досега е познат само еден полуфинален дуел: Шпанија – Франција. Вториот полуфинален пар ќе биде познат по натпреварите: Норвешка – Англија и Аргентина – Швајцарија

Светското првенство 2026 влегува во завршната фаза, а секој натпревар носи сè поголем притисок и борба за место во историјата.