Силно невреме проследено со пороен дожд, засилен ветер, грмежи и појава на град попладнево зафати неколку региони низ земјата. Според вонредните информации од Управата за хидрометеоролошки работи (УХМР), атмосферската нестабилност се движеше од запад кон исток, оставајќи зад себе поројни врнежи во повеќе градови. Метеоролозите најавуваат дека сличен нестабилен бран со локално невреме ќе продолжи и утре, вклучително и на подрачјето на Скопската Котлина.
Првите силни јадра на нестабилност се развија попладнево северозападно и северно од Кичево, како и во околината на Дебар и Битола. Облачниот систем брзо доби на интензитет, ширејќи се кон Македонски Брод, каде што беше регистриран силен ветер и појава на суградица.
Поројни врнежи со грмежи зафатија делови од Гостивар и Неготино, а невремето подоцна се префрли западно од Велес и кон Кочани. Официјалните мерни станици на УХМР во 17 часот измерија максимални 36,9 степени во Гевгелија и 36,6 во Демир Капија, додека во Струмица наврнаа 45,4 литри на метар квадратен, со што температурата таму падна на 21,3 степени.
Управата за хидрометеоролошки работи најавува дека утре времето ќе се задржи сончево и топло претпладне, но во попладневните часови ќе следи нов бран на нестабилност. Наместа процесите ќе бидат поинтензивни, со услови за појава на локално невреме со град, силен северен ветер и пороен дожд.
За главниот град прогнозата предвидува можност за краткотрајно невреме во делови од котлината, проследено со електрични празнења и силен ветер од променлив правец.
Нестабилноста се очекува целосно да стивне кон крајот на работната недела. Од петок, 4 септември, следува период на претежно сончево и топло време со мала до умерена облачност.
Дневните температури повторно ќе бидат во пораст и ќе се движат во интервал од 28 до 36 степени во петок и сабота, додека во недела, на 6 септември, максималните вредности ќе достигнат до 37 степени.
