Израелскиот премиер Бенјамин Нетанјаху во разговори зад затворени врати признал дека сè потешко може да влијае врз ставот на американскиот претседател Доналд Трамп за Иран, објавија израелски медиуми. Информацијата доаѓа во момент кога Вашингтон и Техеран, според повеќе извештаи, се приближуваат до договор што треба да стави крај на војната со Иран и да го отвори Ормускиот теснец.
Израелскиот Канал 13, повикувајќи се на неименувани политички извори, објави дека Нетанјаху на затворени состаноци изразил загриженост од договорот што се подготвува меѓу САД и Иран. Според тие извори, израелскиот премиер признал дека Израел во моментов „нема простор за маневрирање“ за да влијае врз одлуките на Трамп.
Израелскиот безбедносен кабинет, според медиумските извештаи, продолжил со состаноци во неделата вечер, додека се зголемуваат сигналите дека договорот може да биде блиску до финализација. Во Израел расте загриженоста дека евентуалниот договор би можел да му даде на Иран политичка заштита, да го намали економскиот притисок и да остави делови од неговата нуклеарна и регионална инфраструктура недопрени.
Според Reuters, Нетанјаху во телефонски разговор со Трамп му кажал дека Израел ќе ја задржи слободата да дејствува против закани, особено во Либан. Од израелски извори било наведено дека Трамп ја поддржал потребата на Израел за оперативна слобода, но и дека секој конечен договор мора да вклучи демонтажа на иранската нуклеарна програма и отстранување на збогатениот ураниум.
Израел стравува од „лош договор“
Главниот страв во Тел Авив е дека дипломатските напори на Вашингтон може да завршат со договор што Израел ќе го смета за недоволен за да го спречи Иран во иднина да развива нуклеарни капацитети. Израелски безбедносни претставници веќе предупредуваат дека договорот, како што се наѕира, „не му служи на израелскиот интерес“, бидејќи може да му даде време на Иран за економско и воено закрепнување.
Трамп во саботата изјави дека договорот со Иран е „во голема мера испреговаран“ и дека се чека финализација, но потоа нагласи дека САД нема да брзаат со потпишување. Според извештаите, можниот договор би требало да ја намали кризата, да го отвори Ормускиот теснец и да постави рамка за понатамошни преговори за иранската нуклеарна програма.
Во меѓувреме, израелските дипломатски напори во Вашингтон, според Канал 13, ги води поранешниот министер за стратешки прашања Рон Дермер. Израел се обидува да влијае врз конечната форма на договорот, но според извештаите, токму тука се појавува проблемот: Трамп сè повеќе го турка дипломатскиот расплет, а Нетанјаху сè потешко го менува правецот.
