Сè поголем број научни докази сугерираат дека невидливата микропластика во крвта на луѓето не е само безопасен отпад, туку сериозна закана која директно го оштетува срцето. Микроскопските парчиња пластика кои се одвојуваат од пластичните шишиња, амбалажата за храна и синтетичката облека веќе се акумулираат во нашите тела. Најновите анализи покажуваат дека овие честички пронашле пат дури и до артериските плаки, зголемувајќи го ризикот од ненадеен мозочен или срцев удар.

Во најновата студија, кардиолозите од Универзитетот во Рим земаа примероци од крвта што тече директно околу срцето кај неколку десетици пациенти. Резултатите беа фрапантни бидејќи покажаа дека дури 84 проценти од луѓето кои доживеале срцев удар имале пластика во својата крв. За споредба, овој процент кај пациентите со полесни срцеви заболувања изнесувал 40 отсто, додека кај здравите лица бил само 32 проценти.

Истражувањето потврди дека пациентите со срцев удар не само што почесто имале пластика во коронарните артерии, туку кај нив била забележана и многу повисока концентрација и поголем диверзитет на различни видови пластика. Највисоките нивоа на токсични материи биле пронајдени токму на местото на блокадата во самата артерија. Дополнително, во овие зони биле измерени покачени воспалителни маркери, со што се потврдува врската меѓу пластиката и опасните внатрешни воспаленија.

Научниците ги анализираа и надворешните влијанија, при што аерозагадувањето и пушењето се покажаа како клучни фактори за внесување на овие материи во организмот. Кај пациентите кои истовремено биле пушачи и живееле во средина со високо загаден воздух, присуството на микропластика било регистрирано кај неверојатни 100 проценти од случаите. Експертите шпекулираат дека цигарите не се само извор на хемиски токсини, туку делуваат како пренесувач кој им помага на пластичните честички полесно да навлезат во белите дробови и крвотокот.

Иако медицината постигна огромен напредок во лекувањето на срцевите болести преку контрола на холестеролот и крвниот притисок, срцевите удари и понатаму се случуваат поради фактори кои се надвор од традиционалните ризици. Во моментов не постои комерцијален тест со кој граѓаните би можеле сами да ја измерат својата изложеност на пластика во секојдневниот живот. Кардиолозите предупредуваат дека отстранувањето на пластиката од организмот е речиси невозможно бидејќи таа веќе навлегува во самите клетки, поради што е итно потребно политичарите да донесат мерки за драстично намалување на глобалното производство на пластика.