Руски сили со дрон го погодија Северниот мост во Киев, при што е оштетен коловозот, соопшти градоначалникот на украинската престолнина, Виталиј Кличко. „Коловозот на Северниот мост е погоден. Итните служби се упатуваат кон местото на настанот“, објави Кличко.

На социјалните мрежи се појавија снимки од моментот на ударот. На нив се гледа мостот исполнет со автомобили. Засега нема официјална потврда за бројот на евентуалните жртви. Овој напад е дел од новата тактика на Москва?

Нападот врз Северниот мост доаѓа само еден ден откако руските сили повторно го нападнаа мостовниот систем на Киев. Од четвртокот, руските дронови во повеќе наврати го гаѓаат Јужниот мост, а потоа на мета се најде и Северниот мост. Мостовите преку Днепар се од клучно значење за Киев бидејќи го поврзуваат источниот и западниот дел од градот. Поради нападите, сообраќајот меѓу двата брега беше привремено прекинуван и пренасочуван.

Фактот што овие големи инфраструктурни објекти во голема мера останаа поштедени од почетокот на руската инвазија во 2022 година отвора важно прашање: зошто Москва токму сега почна да ги напаѓа?

Според анализа на „Kyiv Post“, целта можеби не е целосно уништување на мостовите, туку нарушување на сообраќајот, логистиката и секојдневното функционирање на градот, како и создавање дополнителен страв кај населението пред зимата. Мостот како „тесно грло“ за целиот град

Јужниот мост е една од најважните сообраќајни артерии на Киев. На две нивоа минуваат патен и железнички сообраќај, а низ него минуваат и дел од клучните енергетски и други инфраструктурни инсталации. Претходните напади покажаа колку чувствителен може да биде овој систем. При еден од нападите, руски дрон експлодирал во момент кога мостот го минувал патнички воз од метрото.

Според извештаите, ударниот бран навлегол преку вентилацијата во вагоните полни со патници. Поголема трагедија била избегната благодарение на реакцијата на машиновозачот, кој навреме ја забележал опасноста и успеал да го забрза возот и да ги оддалечи патниците од местото на експлозијата.

Иако мостот не бил урнат, оштетувањата биле доволни за со часови да се прекинува, пренасочува и повторно воспоставува сообраќајот. Зошто се напаѓа мост што тешко може да биде урнат?

Воздухопловниот експерт и поранешен инженер на „Антонов“, Константин Криволап, смета дека целосно уништување на ваков масивен мост со дронови не е реална цел. Според него, дури и експлозивно полнење од околу 50 килограми не би било доволно за да се урне конструкција со вакви димензии.

Затоа, вистинскиот ефект од нападите може да биде поинаков: забавување на сообраќајот, нарушување на логистиката, создавање метеж и зголемување на психолошкиот притисок врз населението. Со други зборови, не е неопходно мостот да падне за нападот да има сериозни последици.

Москва се подготвува за зимата?

Според анализата на „Kyiv Post“, времето на нападите исто така не е случајно. Тие се случуваат само неколку дена откако Киев соопшти дека дошол до руски планови за зимски напади врз критичната инфраструктура.

Првиот вицепремиер и министер за енергетика Денис Шмихал изјави дека документите содржат детални проценки за оружјето потребно за напади врз објекти за производство на електрична енергија, греење и водоснабдување, како и врз канализацискиот систем и енергетските врски со Европа.

Киев досега поставил повеќе од 200 заштитни конструкции околу енергетски објекти. Нападите врз мостовите сега отвораат можност дека списокот на цели се проширува и на инфраструктурата која директно го одржува нормалното функционирање на градот.

Мерц во Киев додека траат нападите

Нападите се случуваат и во момент кога германскиот канцелар Фридрих Мерц пристигна во Киев за да ја изрази поддршката за Украина и претседателот Володимир Зеленски.

Германската влада најави пакет мерки што вклучува една милијарда евра воена помош и 350 милиони евра за обновување на украинскиот енергетски сектор.

За време на посетата се очекува да биде финализиран и договор за заедничко производство на различни видови беспилотни летала.

„Денес отпатував за Киев бидејќи на Украина ѝ е потребна целата наша поддршка во неделите што следуваат“, изјави Мерц.

Тој порача дека доколку Русија не биде запрена, нејзината воена машинерија „порано или подоцна“ може да се сврти и кон други земји.

Новиот украински проектил ја зголемува тензијата

Нападите врз Киев се случуваат и во период кога Украина соопшти дека за првпат во борба употребила сопствена тактичка балистичка ракета FP-7.

Според украинските власти, ракетата има дострел меѓу 200 и 250 километри и ја произведува домашната компанија „Fire Point“.

Развојот на вакво оружје му овозможува на Киев постепено да ја намалува зависноста од западните системи со долг дострел.

Во анализата се наведува дека руските удари врз украинските градови често се засилуваат во моменти кога руските сили имаат проблеми да ги остварат целите на фронтот или кога Украина постигнува важен стратешки напредок.

На тој начин, нападите врз градовите и цивилната инфраструктура стануваат дел од пошироката стратегија за создавање притисок врз украинското население.

За Киев, нападот врз Северниот мост е уште едно предупредување дека зимата може да донесе нова битка – не само на фронтот, туку и за секојдневното функционирање на градот.