Најмалку 18 лица се повредени во ноќен руски напад со дронови врз Одеса, соопштија украинските власти. Меѓу повредените има и 17-годишно момче, а две лица се во тешка состојба на интензивна нега.
Најголема штета е регистрирана во Приморскиот округ, каде биле погодени високатница и петкатна станбена зграда, по што избувнале пожари на горните катови и покривите. Оштетени се и приватни куќи во централниот дел на градот.
Според локалните власти, значителна штета претрпела и детска градинка, а погодени се трговски центар, хотел и административни простории. Уништени или оштетени се и десетици автобуси и автомобили на неколку паркинзи.
Украинските воздухопловни сили соопштија дека Русија лансирала една балистичка ракета и 206 дронови врз Украина, од кои 172 биле пресретнати. Напади се регистрирани и врз инфраструктурни објекти, складишта и гаражна зона во Одеса, додека расчистувањето и проценката на штетите продолжуваат.
