Научниците предупредуваат на опасност од огромни одрони на две планински падини во Гренланд, чие уривање би можело да предизвика разорни цунамија. Особена загриженост предизвикува една од падините, чија нестабилност забрзано се зголемува. Според истражувачите, таа би можела да се урне во следните неколку години или децении.

Во такво сценарио, жителите на блиското населено место би имале само шест минути да реагираат пред да пристигне цунамито.

Истражувањето е објавено во научното списание „Комуникејшнс Ертк енд Енвајронмент“, а го спровеле научници од Геолошкиот завод на Данска и Гренланд и Норвешкиот геотехнички институт. Тие анализирале две нестабилни падини во системот на фјордови Уумманак, на западот на Гренланд.

Одронот може да предизвика цунами за шест минути

Како поитна опасност истражувачите ја издвојуваат падината во фјордот Кангерлуарсук, каде што има околу 30 милиони кубни метри нестабилен материјал.

Пред 2015 година промените на падината биле речиси незабележливи, но оттогаш нејзината нестабилност почнала забрзано да се развива. Научниците предупредуваат дека процесот можеби дополнително се забрзува.

„Веројатно целосно или делумно ќе се урне во следните неколку години или децении, иако точниот момент и понатаму е многу неизвесен“, наведуваат авторите на истражувањето.

Компјутерските симулации покажуваат дека евентуалниот одрон би можел да предизвика цунами што ќе стигне до населеното место Укисусат за само шест минути. Тоа се наоѓа на околу 25 километри од падината.

Во ова сценарио, брановите во населеното место би можеле да достигнат висина од три до седум метри над вообичаеното морско ниво, што би претставувало сериозна опасност за жителите.

Втората падина крие околу 400 милиони кубни метри материјал

Уште поголема нестабилна падина се наоѓа во фјордот Карат, само три километри западно од местото каде што во 2017 година се случил катастрофален одрон. Таа зафаќа површина од 2,65 милиони квадратни метри, а научниците проценуваат дека содржи околу 400 милиони кубни метри нестабилен материјал.

Нејзиното евентуално уривање би можело да предизвика исклучително голем одрон и цунами. Истражувачите ги анализирале двете локации поради ризикот што го претставуваат за населените места во близина на фјордовите.