На денешен ден, 28 јули, низ светската историја се случиле бројни настани што оставиле траен белег во политиката, културата, науката и војните.

Во 1586 година, англискиот научник Томас Хериот го донел компирот од Америка во Англија, од каде подоцна се проширил низ Европа.

Во 1655 година починал францускиот писател Сирано де Бержерак, кој подоцна станал инспирација за прочуената драма на Едмон Ростан.

На 28 јули 1741 година починал италијанскиот композитор Антонио Вивалди, автор на славниот циклус концерти „Четири годишни времиња“, а девет години подоцна, во 1750 година, починал и еден од најголемите композитори во историјата – Јохан Себастијан Бах.

Во 1794 година на гилотина бил погубен Максимилијан Робеспјер, со што завршила јакобинската диктатура за време на Француската револуција.

Во 1821 година, Перу прогласил независност од Шпанија.

Во 1858 година, за првпат бил употребен отпечаток од прст како средство за идентификација, што претставува почеток на современата форензика.

Во 1868 година бил ратификуван 14. амандман на Уставот на САД, со кој црномурестото население добило американско државјанство.

Во 1876 година, Црногорците ја победиле османлиската војска во Битката кај Вучји Дол.

Најзначајниот историски настан на овој датум се случил во 1914 година, кога Австроунгарија ѝ објавила војна на Србија, еден месец по Сараевскиот атентат врз престолонаследникот Франц Фердинанд. Со тоа започнал синџирот на настани што довел до Првата светска војна.

Во 1919 година во Амстердам бил основан Меѓународниот синдикален сојуз.

Во 1937 година, јапонските сили го зазеле Пекинг за време на Кинеско-јапонската војна.

Во 1941 година, германските окупациски сили во Белград стрелале повеќе од 120 цивили како одмазда за саботажа.

Во 1945 година, американски бомбардер Б-25 поради густа магла удрил во облакодерот „Емпајер стејт билдинг“ во Њујорк, при што загинале 14 лица.

Во 1968 година починал германскиот хемичар и нобеловец Ото Хан.

Во 1976 година, катастрофалниот земјотрес во кинескиот град Тангшан однел најмалку 242.000 животи, што го прави еден од најсмртоносните земјотреси во модерната историја.

Во 1984 година, американскиот претседател Роналд Реган ги отворил Олимписките игри во Лос Анџелес, кои биле бојкотирани од Советскиот Сојуз и дел од неговите сојузници.

Во 1999 година, Европскиот суд за човекови права првпат осудил една европска држава – Франција – за тортура врз приведено лице.

Во 2000 година, мировните сили на Обединетите нации влегле во пограничната област меѓу Либан и Израел по повлекувањето на израелската војска.

Во 2005 година, Ирската републиканска армија (ИРА) официјално прогласила крај на вооружената борба и најавила дека своите цели ќе ги остварува исклучиво со политички средства.

Во 2010 година, Каталонија станала првиот шпански регион што ги забранил борбите со бикови, а истата година во авионска несреќа кај Исламабад загинале сите 152 патници и членови на екипажот на летот на компанијата Ерблу.

Во 2018 година, египетски суд осудил 75 лица на смрт поради учество во протестите од 2013 година.

Во 2023 година, генерал Абдурахман Чијани се прогласил за лидер на воената хунта во Нигер по државниот удар.

На 28 јули 2024 година, и актуелниот претседател Николас Мадуро и опозицискиот кандидат Едмундо Гонзалес Урутија прогласиле победа на претседателските избори во Венецуела, по што избувнале масовни протести поради обвинувања за изборна измама.