Ледената покривка на Антарктикот доби рекордни 695 милијарди тони маса меѓу 2021 и 2023 година, покажува нова студија објавена во списанието Nature. Истражувачите од Институтот за океанологија при Кинеската академија на науките утврдија дека невообичаениот прилив на влага и обилните снегови на источниот дел од континентот биле предизвикани од долготрајно загревање на океанот илјадници километри подалеку, во тропскиот појас на Тихиот и Индискиот Океан.
Сателитските мерења на мисијата GRACE забележаа најголемо зголемување на ледената маса откако постојат вакви мерења. Истражувачкиот тим утврди дека тоа не се должи на локално заладување, туку на атмосферски пресврт. Топлиот океански басен каде што се среќаваат западниот Пацифик и источниот Индиски Океан со години задржа екстремно високи температури.
Оваа акумулација на топлина покрена планетарен атмосферски бран што ја преобликуваше циркулацијата на воздухот над Источен Антарктик. Се создаде систем што делуваше како спроводник за атмосферски реки, туркајќи влажен воздух од умерените географски широчини директно кон регионите Земја на Кралицата Марија и Вилксова Земја, каде што паднаа рекордни количества снег.
Симулациите на атмосферските движења покажаа дека само девет отсто од зголемените врнежи можат да се припишат на глобалното загревање предизвикано од човечки фактори. Главниот двигател беше повеќегодишната природна осцилација во тропскиот топол појас, феномен што се повторува приближно еднаш во секоја деценија.
„Откривме досега недоволно препознаена патека на атмосферска врска меѓу тропскиот топол басен и ледената покривка на Источен Антарктик“, изјави водечкиот автор на истражувањето, Јунхе Ванг. Според него, овие сознанија даваат теоретска основа за подобро разбирање на климатските промени во овој дел од светот.
Научниците децидно нагласуваат дека овој краткотраен пораст не претставува пресврт на генералниот климатски тренд. Во изминатите две децении, Антарктикот губеше во просек по околу 140,5 милијарди тони мраз годишно.
Додека источниот дел привремено натрупа снег, Западниот Антарктик продолжува постојано да губи маса. Топлите длабински морски струи продолжуваат да ги поткопуваат ледените гребени одоздола, забрзувајќи го лизгањето на глечерите кон океанот и одржувајќи го ризикот од долгорочно покачување на глобалното ниво на морињата.
