На почетокот на врската лесно е да помислиме дека сме се заљубиле, особено кога чувствата се силни, а другата личност ни изгледа речиси совршена. Но, занесеноста и љубовта не се исто.

Занесеноста обично е интензивна, но краткотрајна. Ја карактеризира идеализирање на другата личност, силна привлечност и постојано размислување за неа. Љубовта, пак, се гради подлабоко – преку доверба, почит, блискост и искрена поврзаност.

Разликата на почетокот може да биде тешко да се забележи. Според психотерапевтката и сексуална терапевтка Дулсинеа Алекс Питагора, и љубовта и занесеноста можат да создадат слични реакции во мозокот поради хемикалии како допамин, окситоцин и адреналин. Адреналинот, сепак, обично е поизразен во фазата на занесеност.

Љубов или само силна привлечност?

Пеперутките во стомакот, возбудата и постојаното мислење на некого можат лесно да нè убедат дека станува збор за љубов. Но, ако личноста едвај ја познавате, а веќе ја доживувате како совршена, поверојатно е дека сте занесени.

Кога чувствата се развиваат постепено, кога постојат доверба, блискост, меѓусебно разбирање и чувство на сигурност, тогаш веќе станува збор за нешто подлабоко.

Како да ја препознаете разликата?

Според експертите, љубовта се гради со време. Таа расте преку заедничките искуства, запознавањето, довербата и начинот на кој партнерите ги надминуваат проблемите.

Занесеноста, од друга страна, често е поврзана со силна привлечност и идеализирање. Во таа фаза човек може да ги гледа само најдобрите страни на другиот и да создаде слика за него која повеќе се темели на сопствените фантазии отколку на реалноста.

„Кога сте занесени, постои фантазија за личноста и за односот. Ја посакувате и имате чувство дека сте ја изгубиле главата“, објаснува психологот Рејчел Нидл.

Занесеноста може да донесе еуфорија, силна желба, промени во расположението, несоница, забрзано чукање на срцето, па дури и намален апетит.

Љубовта е помирна, но подлабока

Љубовта не значи дека исчезнува страста. Разликата е во тоа што покрај привлечноста постојат и доверба, сигурност, почит, интимност и посветеност.

Кога навистина го сакате партнерот, ги познавате и неговите добри и лоши страни. Не го доживувате како совршена личност, туку го прифаќате како целина.

Здравата врска се темели на отворена комуникација, искреност и меѓусебна поддршка. Интересно е што истражувањата покажуваат дека паровите кои воедно се и добри пријатели имаат тенденција да бидат попосветени и поподдржувачки еден кон друг.

Неколку знаци дека сте само занесени

Занесеноста често доаѓа брзо. Верувате во „љубов на прв поглед“, постојано мислите на новата личност и ја идеализирате.

Може да се чувствувате несигурно кога не сте заедно, постојано да анализирате што значи секоја порака или постапка и да имате силни промени во расположението.

Кај љубовта чувствата обично се развиваат постепено. Се чувствувате сигурно и кога сте заедно и кога сте одвоени. Ја познавате личноста реално, ги гледате и нејзините недостатоци и сепак сакате да бидете со неа.

Што ако ги помешате?

Тогаш може да донесете големи одлуки врз основа на чувство кое е само привремено.

Експертите предупредуваат дека занесеноста може да доведе до нереални очекувања, пребрзо продлабочување на односот или носење важни животни одлуки пред партнерите навистина да се запознаат.

Нема ништо лошо во интензивниот почеток на една врска, но потребно е време за да се види дали силната привлечност ќе прерасне во нешто потрајно.

Може ли занесеноста да прерасне во љубов?

Да. Занесеноста со текот на времето може да се претвори во зрела љубов, особено ако партнерите постепено се запознаваат, градат доверба и умеат отворено да разговараат за несогласувањата.

Но, тоа не се случува преку ноќ.

За почетниот занес да прерасне во љубов потребни се време, трпение, искреност и подготвеност да се види партнерот онаков каков што навистина е, а не онаков каков што сакаме да биде.

И можеби токму тука е најголемата разлика: занесеноста го гледа идеалот, а љубовта ја прифаќа реалната личност.