Шпанија се соочува со вистински метеоролошки пекол откако државната метеоролошка служба (АЕМЕТ) го запали портокаловиот аларм во поголемиот дел од земјата. Вториот силен топлотен бран ова лето носи нереално високи температури кои на места ќе се движат од 42°C па сè до екстремни 44°C. Овој огнен бран, кој го зафати Пиринејскиот Полуостров, се очекува да го достигне својот врв во почетокот на неделата и да донесе сериозни главоболки за локалното население.
Најкритично ќе биде во речните долини на југозапад каде живата во термометарот масовно ќе ја надмине границата од 41 степен. Иако многумина мислеа дека полошо не може да биде, метеоролозите предупредуваат дека вистинскиот врв на жештините доаѓа во вторник, кога во внатрешноста на земјата и во пределите околу Ебро ќе бидат измерени рекордни 44 степени. Ваквата состојба дополнително ја комплицира и онака драматичната борба со шумскиот пожар во Бисбал д’Емпорда, каде силниот ветар и сувиот воздух се вистински сојузници на огнената стихија. Спас од жештините нема да има ниту на крајбрежјето, освен во западна Галиција, каде дури кон крајот на денот ќе почне да се чувствува благо освежување од морето.
Андалузија традиционално е на удар на најтешките удари на летото. Градовите како Севиља, Уелва и Хаен веќе „горат“ на над 40 степени, а ситуацијата е алармантна и во Протокот на Гибралтар, каде покрај жештините, дува и силен, опасен ветар. Овојпат од пеколот не се поштедени ниту популарните Канарски Острови, каде локалните власти во Гран Канарија и Тенерифе веќе прогласија вонредна состојба и итна тревога поради огромен ризик од избувнување на нови шумски пожари.
Ова е втор ваков екстремен бран во Шпанија за многу краток период, а јавноста со страв гледа кон термометрите бидејќи првиот бран зад себе остави црна статистика – речиси 900 смртни случаи во текот на јуни. Лекарите и нутриционистите предупредуваат дека овојпат најголемата опасност нема да биде само преку ден, туку во текот на ноќта. Земјата влегува во фаза на мачни „тропски ноќи“ каде минималните температури нема да паднат под 26°C или 28°C. Ова значи дека човечкиот организам нема да има никаква можност да се разлади и да се одмори од дневниот стрес, што е огромен ризик за постарите лица, децата и хронично болните. Апелот до граѓаните и туристите е максимално сериозен: никако да не излегуваат на сонце во средината на денот, да пијат енормни количини вода и целосно да ги заборават сите физички активности на отворено.
