Американскиот државен секретар Марко Рубио изјави дека најмалку десет цивилни морнари загинале во тековните судири во Ормускиот теснец. Говорејќи во Белата куќа, Рубио истакна дека САД ќе продолжат со распоредување на свои „средства за одбрана на слободата на пловидба“ во овој клучен поморски коридор.
„Тие се изолирани, гладни, ранливи и најмалку десет цивилни морнари загинаа како резултат на тоа“, изјави Рубио, без да наведе дополнителни детали.
„Операцијата е завршена, сега се браниме“
Рубио нагласи дека американските активности сега имаат исклучиво одбранбен карактер. Според него, почетната воена операција против Иран е завршена.
„Одговараме само ако бидеме нападнати. Ако не се пука врз овие бродови или врз нас – ние не отвораме оган“, потенцираше тој.
Тој додаде дека е време Техеран „да ја прифати реалноста“, нагласувајќи дека американските пратеници Стив Виткоф и Џаред Кушнер продолжуваат да бараат дипломатско решение. Според Рубио, евентуалниот договор треба да го опфати и прашањето за нуклеарниот материјал што Иран наводно го има складирано.
Тој не откри детали за напредокот на преговорите, но истакна дека договорот нема да се постигне преку ноќ и дека е потребен јасен дипломатски рамковен договор за клучните прашања и можните отстапки.
