Европа мора да ги засили своите напори и појасно да ги брани сопствените интереси, порача францускиот претседател Емануел Макрон во Атина. Според него, Европјаните се наоѓаат во момент кога САД, Русија и Кина сè поотворено дејствуваат спротивно на европските интереси.
„Не смееме да потцениме дека ова е единствен момент во кој американскиот претседател, рускиот претседател и кинескиот претседател се против Европјаните. Ова е вистински момент да се разбудиме“, рече Макрон во разговор со грчкиот премиер Киријакос Мицотакис, организиран од весникот „Катимерини“ во Атина.
Макрон порача дека Европа мора да има повеќе самодоверба и да постави сопствена агенда.
Францускиот претседател оцени дека тензиите со САД нема да исчезнат ниту по мандатот на американскиот претседател Доналд Трамп.
„Ова е историски тренд. Можеме да соработуваме со САД за одредени прашања, што и понатаму има смисла поради заедничките вредности и историските врски, но верувам дека ваквиот американски пристап ќе продолжи“, рече Макрон.
Тој додаде дека разликата меѓу првиот и вториот мандат на Трамп е во тоа што многу европски земји првиот мандат го гледале како исклучок што ќе помине без потреба од големи промени.
„Сега многу колеги се посвесни за ситуацијата, бидејќи по толку години разбираме дека мора да реагираме. Мора да дејствуваме како Европјани, да бидеме пообединети и да ги браниме сопствените интереси. За мене, тоа е вистинската насока“, изјави Макрон.
Макрон во Атина пристигна по неформалниот состанок на Европскиот совет на Кипар, во период кога Франција и Грција треба да потпишат обновување на билатералниот безбедносен договор.
Станува збор за ажурирање на договорот од 2021 година, постигнат меѓу Макрон и Мицотакис, кој вклучува клаузула за меѓусебна одбрана и обврска Грција да купи француски воени бродови во вредност од најмалку 3 милијарди евра.
Новиот договор треба да биде продолжен за уште пет години, со можност за автоматско продолжување. Се очекува и проширување на соработката во области како надворешната политика, цивилната заштита и економијата.
