Делата на македонски автори стануваат подостапни за читателите преку нова електронска библиотека што ја отвори „Паноптикум“. Проектот е замислен како дигитален простор за објавување, зачувување, промоција и читање македонски книги, со можност до изданијата да се пристапи преку компјутер, таблет или мобилен телефон.
Во новата е-библиотека веќе се застапени автори како Иван Џепароски, Љупчо Димитровски и Ненад Георгиевски, а проектот ги поврзува „Паноптикум“, КЛИК е-издаваштво и е-Библиотека Паноптикум во единствен издавачки и медиумски систем.
Од „Паноптикум“ велат дека платформата не е замислена само како дигитална архива.
„Е-Библиотеката не е замислена како обична архива на ПДФ-документи, туку како уредена дигитална библиотека и издавачка платформа“, велат издавачите.
Секоја публикација има сопствено место во каталогот, со библиографски и авторски податоци и можност за онлајн читање. Корисниците преку својот профил имаат и лична секција „Моја библиотека“.
Од Рацин до Цепенков – книги достапни онлајн
Во каталогот веќе се достапни дела од современи, но и од класици на македонската книжевност.
Меѓу бесплатно достапните наслови се „Бели мугри“ од Кочо Рацин, „Бегалка“ од Васил Иљоски и „Силјан Штркот – Кузман Капидан“ од Марко Цепенков.
Овие изданија се достапни преку соработка со Градската библиотека „Браќа Миладиновци“ од Скопје.
На овој начин дел од книжевното наследство што се чува во библиотечните фондови повторно се доближува до читателите, но овојпат во дигитална форма.
Книгите достапни и за дијаспората
Една од главните цели на проектот е македонската книга да биде достапна независно од тоа каде се наоѓа читателот. Тоа значи дека до дигиталните изданија можат да пристапат и читатели во Македонија, но и македонската публика во дијаспората. Со создавањето на ваков дигитален каталог, проектот отвора простор македонската книжевност да се зачувува, промовира и чита на начин што одговара на современите навики на читателите.
Целта е е-библиотеката постепено да прерасне во поширок дигитален каталог на македонски книги, со авторски и библиографски податоци и организиран пристап до изданијата.
