Иако Македонија е рангирана како најевтината земја во Европа според најновите податоци на Евростат, експертите предупредуваат дека ова не треба да се толкува како показател за подобар животен стандард. Напротив, ниските цени најчесто одат рака под рака со пониски приходи, па вистинската слика се добива само кога заедно се анализираат цените, платите и куповната моќ на граѓаните.

Според анализата на Европскиот завод за статистика, Евростат, индексот на потрошувачките цени во Македонија изнесува 49,7. Тоа значи дека производите и услугите кои во просек во Европската Унија чинат 100 евра, кај нас би чинеле околу 50 евра. По Македонија на листата на најевтини европски земји следуваат Турција, Босна и Херцеговина, Романија, Бугарија и Србија, кои исто така имаат потрошувачки цени под просекот на Европската Унија.

Ниските цени не значат и поголема куповна моќ

Економистите посочуваат дека цените сами по себе не се доволни за да се процени квалитетот на животот. Во земјите со повисоки примања, иако производите и услугите се поскапи, високите плати им овозможуваат на граѓаните значително поголема куповна моќ. Македонија е типичен пример каде што ниските цени се придружени со релативно ниски приходи, па за многу семејства секојдневните трошоци и понатаму претставуваат сериозен товар.

Интересен е примерот на Србија, која според вкупниот индекс е меѓу поевтините европски држави, но цените на храната и безалкохолните пијалаци таму достигнуваат дури 96 проценти од просекот на Европската Унија. Дополнително, потрошувачката електроника во Србија е околу 30 проценти поскапа од европскиот просек, а апаратите за домаќинство се повисоки за околу 11 проценти. Од друга страна, ниските цени на електричната енергија и греењето значително го намалуваат вкупниот индекс на потрошувачките цени.

На спротивниот крај од листата се Исланд, Швајцарија, Данска, Ирска и Норвешка, каде цените се далеку над европскиот просек. Во рамките на Европската Унија, најскапа земја е Луксембург, додека најевтина членка останува Романија. Заклучокот на економистите е дека титулата „најевтина земја во Европа“ сама по себе не значи и најдобар живот. За реална споредба неопходно е покрај цените да се земат предвид и висината на платите, куповната моќ и вкупните трошоци за живот.