Лушпата од јаболко најчесто завршува во корпа, особено кога подготвуваме пита, колач или овошен десерт. Но, токму тој дел од јаболкото може да биде корисен и во кујната и во домот – од природен чај и крцкав чипс, до освежување на просторот и чистење садови.
Јаболката се извор на растителни влакна, витамин Ц и фитохемикалии како кверцетин, катехин и хлорогенска киселина, а дел од овие соединенија се наоѓаат токму во лушпата. Затоа, доколку јаболката се добро измиени, лушпата не мора да се фрла, туку може практично да се искористи.
Од лушпа до крцкав чипс
Еден од наједноставните начини да ја искористите лушпата од јаболко е да ја претворите во домашен чипс. Лушпите може да се наредат на хартија за печење, да се попрскаат со малку вода, шеќер и цимет, а потоа да се печат на ниска температура додека не станат крцкави. Така се добива лесна ужинка со мирис на есен, која може да се јаде сама или да се додаде во овесна каша, јогурт или десерт.
Од лушпите може да се направи и едноставно желе, особено затоа што јаболката природно содржат пектин, растително влакно кое се користи за згуснување на џемови и желеа.
Природен трик за чистење садови
Лушпата од јаболко може да помогне и при чистење алуминиумски садови. Поради природните киселини во јаболкото, особено јаболковата киселина, лушпите може да помогнат во омекнување на маснотии и наслаги. Доволно е во садот да ставите вода и лушпи од неколку јаболка, да ги оставите да вријат 15 до 30 минути, а потоа садот да се измие со сунѓер. Овој метод е најсоодветен за чистење, не за готвење храна во алуминиум, бидејќи киселите намирници можат да реагираат со алуминиумски површини.
Топол чај од јаболкова лушпа
Лушпата може да се искористи и за ароматичен домашен чај. Во сад ставете лушпи од јаболко, три до четири чаши вода, малку цимет и неколку капки лимон. Варете околу 15 минути, процедете, па на крај додадете мед. Овој пијалак е добар избор кога сакате нешто топло, миризливо и без вештачки ароми.
Освежувач за домот без хемикалии
Лушпите од јаболка можат да послужат и како природен освежувач на воздухот. Ставете ги во тенџере со вода, додадете цимет, ѓумбир, лимон или каранфилче и оставете ги да вријат на тивок оган. Додека течноста испарува, низ домот ќе се рашири топол, пријатен мирис.
