Повеќе од 50.000 луѓе починале во Европа во текот на летото 2026 година поради екстремните горештини, а околу 32.000 од смртните случаи се поврзуваат со климатските промени. Ова го покажуваат две научни студии објавени во академското списание „Нејчр хелт“.

Истражувањата ги спровеле научници од Империјал колеџ во Лондон и од Лондонската школа за хигиена и тропска медицина. Анализата опфатила 854 градови во Европската Унија, Обединетото Кралство, Норвешка и Швајцарија, во кои живеат околу 40 отсто од населението на овие 30 земји, објави бриселскиот „Политико“, пренесува Танјуг.

Според резултатите, летото 2026 година било најсмртоносно во овој век во однос на смртноста поврзана со високите температури. Бројот на жртви значително ги надминал претходните рекорди: околу 29.000 смртни случаи во 2022 година и 28.000 во 2003 година. Резултатите повторно го отвораат прашањето за последиците од екстремните температури врз здравјето на луѓето и за влијанието на климатските промени врз смртноста во Европа.