Автонова официјално ја претстави автомобилската марка Leapmotor на македонскиот пазар, со што го проширува своето портфолио во сегментот на електричната мобилност. Новата соработка доаѓа во година кога компанијата одбележува 30 години присуство во автомобилската индустрија и најавува нови инвестиции.
Автонова официјално ја промовираше глобалната технолошка автомобилска марка Leapmotor во Македонија, отворајќи ново поглавје во развојот на електричната мобилност на домашниот пазар. Претставувањето се одржа во годината кога компанијата слави три децении работа, при што од Автонова истакнаа дека и понатаму остануваат посветени на квалитетната послепродажна поддршка и грижата за клиентите.
Од компанијата порачаа дека Leapmotor не е само нов бренд во нивното портфолио, туку долгорочна инвестиција и продолжување на стратегијата за воведување современи и одржливи решенија во автомобилската индустрија. Воедно беше најавено и отворање на нов продажно сервисен објект, целосно посветен на оваа марка.
Автонова, која е ексклузивен увозник на Citroën за Македонија, Србија, Црна Гора, Албанија и Косово, преку партнерството со Stellantis сега ја носи и Leapmotor. Брендот веќе има повеќе од 1,5 милиони корисници ширум светот и е препознатлив по развојот на електрични возила со модерен дизајн, напредна технологија и достапни решенија за секојдневно користење.
На промотивниот настан беше претставена целата понуда на модели, која опфаќа компактни градски автомобили, семејни SUV модели и спортски електрични возила. Сите модели веќе се достапни за разгледување во продажниот салон на Автонова.
Посебно внимание привлече моделот Leapmotor T03, целосно електричен градски автомобил од новата генерација. Возилото располага со електричен мотор со моќност од 70 kW, автономија до 265 километри според WLTP стандардот и можност за брзо полнење од 30 до 80 проценти за околу 36 минути. Почетната цена на моделот на македонскиот пазар изнесува 17.990 евра.
Со воведувањето на Leapmotor, Автонова дополнително ја зајакнува својата понуда во сегментот на електричните возила и најавува нови чекори кон развојот на одржливата мобилност во Македонија.
