Европската комисија смета дека Црна Гора, Албанија, Молдавија и Украина се моментално четирите најнапредни земји кандидати на патот кон членство во Европската Унија. Ова го изјави европската комесарка за проширување Марта Кос пред новинарите, претставувајќи го планот на Европската комисија за подготовка на Унијата за идното проширување.

За овие четири земји Комисијата кон крајот на октомври ќе претстави посебни мапи на патот кои ќе ги содржат следните чекори, рамковните рокови и конкретните цели во пристапниот процес.

„Овие земји покажаа значителен напредок во поглед на подготвеноста во текот на изминатите години“, рече Кос.

Според нејзините зборови, целта на мапите на патот е да им се помогне на земјите кандидати да го одржат напредокот во реформите и да се обезбеди поголема предвидливост на нивниот пат кон членството.

Кос, сепак, нагласи дека процесот и понатаму ќе биде заснован на поединечните резултати на секоја земја кандидат.

„Нема да има кратенки“, порача европската комесарка.

Кос оцени дека Подгорица, доколку продолжи со досегашното темпо, би можела да го заврши техничкиот дел од преговорите кон крајот на оваа или на почетокот на следната година.

За Украина патоказот ќе биде специфичен поради војната, додека и нејзиниот понатамошен напредок ќе зависи од спроведувањето на реформите.

Европската комисија истовремено сака да воведе поамбициозен модел на постепена интеграција, кој на земјите кандидати би им овозможил, по исполнувањето на одредени стандарди, да учествуваат во одделни политики и стратешки сектори на ЕУ и пред полноправното членство.

Меѓу областите што се споменуваат се енергетиката, сообраќајот, вештачката интелигенција, безбедноста и одбраната.

Кос порача дека постепената интеграција не е замена за полноправно членство, туку начин пристапниот процес да се забрза.

Истовремено, Европската комисија предлага посилни механизми со кои би можела да реагира во случај на сериозно назадување на идните членки во областа на владеењето на правото, демократијата и основните права.