Киев повторно се разбуди под сирени, чад и урнатини. Најмалку 11 лица загинаа, а 46 се повредени во масовен руски напад врз украинската престолнина, соопштија украинските власти. Меѓу повредените има и деца, а спасувачките екипи продолжуваат да трагаат по луѓе под урнатите делови од станбените згради.

Најтешко погодени се Подилскиот и Дарницкиот реон, каде што ракети погодиле повеќекатници. Според украинските служби, оштетени се најмалку 15 станбени објекти, а на повеќе локации избувнале пожари.

Градоначалникот на Киев, Виталиј Кличко, соопшти дека дел од повредените се хоспитализирани, а спасувачи и медицински екипи работат на терен во зградите каде што има директни погодоци.

Нападот се случува во пресрет на самитот на НАТО во Турција, каде што се очекува украинскиот претседател Володимир Зеленски да се сретне со американскиот претседател Доналд Трамп.

Само неколку часа пред нападот, Зеленски предупреди дека украинските разузнавачки информации укажуваат на нов голем руски удар врз Киев. Претходно, главниот град веќе беше погоден во напад во кој загинаа десетици лица.

Украинскиот претседател повторно побара од западните сојузници побрза испорака на системи за противвоздушна одбрана и ракети со долг дострел, предупредувајќи дека секое одложување ја зголемува цената што ја плаќаат цивилите.

Москва, пак, тврди дека нејзините напади се насочени кон воени и енергетски објекти, како одговор на украински удари врз руска инфраструктура.

За Киев, ова е втор голем напад за само неколку дена. За жителите, уште една ноќ помината во засолништа и уште едно утро во кое спасувачите пребаруваат низ бетон, стакло и прашина.