Јутјуб мјузик почнува да воведува нови ознаки за песните во чијашто изработка главно била користена генеративна вештачка интелигенција. Целта е слушателите да добијат појасни информации за потеклото на музиката што ја слушаат, во време кога алатките за создавање музика со ВИ стануваат сè подостапни.

Од Јутјуб велат дека развојот на генеративната вештачка интелигенција им отвора нови можности на музичарите за создавање, експериментирање и споделување музика. Истовремено, слушателите сè почесто бараат транспарентност и јасни информации за тоа дали некоја песна е создадена со помош на овие технологии.

Ознаката ќе се гледа додека се слуша песната

Новите ознаки се однесуваат на песните во чијашто изработка генеративната вештачка интелигенција имала значајна улога, вклучително и при создавањето музичката композиција и вокалите. Ознаката ќе биде прикажана директно на страницата за репродукција на песната во Јутјуб мјузик, а со нејзино избирање ќе се отвора мени со дополнителни информации за музичката содржина.

Од компанијата најавуваат дека со текот на времето ваквото означување ќе се прошири и на главната апликација Јутјуб.

Сепак, постои едно важно ограничување: засега платформата не нуди можност за филтрирање на ВИ-музиката. Тоа значи дека корисниците не можат целосно да ги отстранат означените песни од резултатите при пребарување или од содржините што им се прикажуваат.

Како ќе се препознава музиката создадена со ВИ?

Јутјуб ќе ги идентификува ваквите песни преку соработка со музичките партнери и со помош на сопствени алатки за детекција. Системот ќе се потпира и на правилата за означување што веќе се применуваат на главната платформа.

Ознаката може да се појави во неколку ситуации: кога авторите самите ќе пријават дека користеле вештачка интелигенција при објавувањето на содржината, кога ќе бидат употребени вградените ВИ-алатки на Јутјуб или кога системот ќе открие таква употреба во одредени случаи, иако авторот не ја пријавил.

Платформата ќе препознава и содржини што содржат валидни податоци за потеклото и автентичноста, засновани врз стандардот Ц2ПА (C2PA), кои можат да потврдат дека содржината е создадена со вештачка интелигенција.

Новите ознаки се чекор кон поголема транспарентност во музичката индустрија, но не значат дека секоја песна што содржи некаков елемент создаден со ВИ нужно ќе биде означена. Засега, слушателите ќе добијат начин полесно да ги препознаат ваквите песни, но не и целосно да ги исклучат од своето музичко искуство.