Израел тврди дека во воздушен напад во Појасот Газа го убил Мохамед Одех, новоименуваниот командант на бригадите „Ал Касам“, вооруженото крило на Хамас. Нападот бил изведен по наредба на израелскиот премиер Бенјамин Нетанјаху и министерот за одбрана Израел Кац, соопштија израелските власти.

Според Израел, Одех бил назначен на функцијата по убиството на неговиот претходник Из ал-Дин ал-Хадад претходно овој месец. Израелските власти го опишуваат како поранешен шеф на разузнавањето на Хамас и како еден од организаторите на нападот врз Израел на 7 октомври 2023 година.

Нападот бил изведен во населбата Римал во градот Газа. Според палестински болнички извори, во нападот загинале најмалку три лица, меѓу кои и жена, а повеќе од 20 биле повредени. Спасувачките екипи продолжиле со работа на местото на ударот.

Хамас засега не ја потврдил ниту ликвидацијата на Одех, ниту неговото назначување за нов командант на вооруженото крило. Израелските власти, пак, порачаа дека ќе продолжат со операции против сите што ги сметаат за одговорни за нападот од 7 октомври.