Израел објави дека ги прекинува сите контакти со генералниот секретар на Обединетите нации, Антонио Гутереш, откако земјата беше ставена на црна листа поради наводно сексуално насилство во конфликтни зони. Израелскиот амбасадор во ОН, Дани Данон, одлуката ја нарече „скандалозна“ и порача дека „со овој генерален секретар е завршено“.

„Одлуката Израел да биде ставен на црна листа и обвинет за користење сексуално насилство како оружје во војна е скандалозна“, изјави Данон во видео објавено на платформата X.

Тој додаде дека канцеларијата на Гутереш „продолжува да шири лаги за Израел“ и оцени дека е неприфатливо земјата да се наоѓа на иста листа со Хамас.

Израел: ОН се политизирана и корумпирана организација

Израелското Министерство за надворешни работи ја нарече одлуката на ОН „срамна и апсурдна“.

Портпаролот Орен Марморштајн изјави дека ова е „уште еден доказ за вистинската природа на ОН – политизирана и корумпирана организација која ги напуштила своите основни принципи и систематски го таргетира Израел“.

Мисијата на Израел во ОН соопшти дека нема да има никакви контакти со кабинетот на генералниот секретар сè додека Гутереш е на функцијата.

ОН: Постојат веродостојни информации

Портпаролот на Антонио Гутереш, Стефан Дижарик, изјави дека канцеларијата на генералниот секретар е запознаена со реакциите на Израел.

„Што се однесува до нас, вратите на генералниот секретар остануваат отворени“, рече Дижарик.

Во годишниот извештај на ОН за сексуално насилство во конфликти, кој наскоро треба да биде објавен, се наведува дека постојат „веродостојни информации“ за сексуално насилство што наводно го извршиле израелските безбедносни сили врз Палестинци во затвори и притворски центри. ОН исто така соопшти дека на нивните инспектори не им бил дозволен пристап до тие објекти.

На истата листа се наоѓа и Хамас, поради обвинувања за сексуално насилство за време на нападот врз Израел на 7 октомври 2023 година, како и поради наводно злоставување заложници.

Продлабочување на кризата меѓу Израел и ОН

Дани Данон тврди дека Израел ги поканил претставниците на ОН да дојдат во земјата и да ги проверат обвиненијата.

„Ги повикавме да дојдат и да ги проверат овие смешни обвинувања. Тие одлучија да не дојдат“, рече Данон.

Односите меѓу Израел и Обединетите нации се на најниско ниво од нападот на Хамас во 2023 година, по кој започна војната во Газа. Израелските власти во изминатиот период жестоко го критикуваа Гутереш и други претставници на ОН поради осудите на израелските напади врз Газа. Во 2024 година, Израел го прогласи генералниот секретар на ОН за непожелна личност.

Израел, исто така, претходно обвини дел од вработените во агенцијата на ОН за палестински бегалци – UNRWA – за вмешаност во нападите од 2023 година.