Иран испрати остра порака до САД, нивните сојузници и до меѓународниот поморски сообраќај дека безбедноста во Ормускиот Теснец ќе важи или за сите, или за никого, откако по кревкото примирје повторно ја засили контролата врз еден од најважните светски енергетски коридори. Техеран најавува нови механизми за надзор и можни ограничувања за бродови поврзани со неговите противници, со што јасно покажува дека теснецот го користи како средство за политички и стратешки притисок во време кога регионот и натаму е далеку од стабилен мир.
Иранските власти порачуваат дека се подготвени да ја гарантираат безбедноста на пловидбата, но истовремено предупредуваат дека тоа нема да важи селективно. Пораката од Техеран е јасна: ако има закани кон иранските бродови или кон стратешките точки на земјата, одговорот ќе биде реципрочен.
Во изминатите денови Иран најави и механизми за зајакнување на контролата врз теснецот, меѓу кои и идеи за наплата на транзит или посебни услови за премин. Таквите најави предизвикаа силни реакции од повеќе држави и меѓународни институции, кои предупредија дека слободата на навигација низ меѓународните теснеци не смее да стане предмет на еднострани условувања. Иако Техеран во меѓувреме негираше дека навистина наплаќал такви давачки за некои бродови, самата закана останува дел од пошироката стратегија на притисок.
Иранската Револуционерна гарда во меѓувреме сигнализираше и нови рути на пловидба поблиску до иранскиот брег, што дополнително ја нагласува намерата на Техеран да го зацврсти својот надзор над овој поморски теснец. Тоа се случува во момент кога САД почнаа блокада на иранските пристаништа, но не и целосно затворање на преминот за бродови што не се поврзани со Иран. Токму затоа, и покрај примирјето, ризикот од нова ескалација останува висок.
