Тројца јужнокорејски војници се тешко повредени во експлозија на нагазна мина во западниот сектор на демилитаризираната зона меѓу двете Кореи, соопшти утрово Здружениот генералштаб на Јужна Кореја. Инцидентот се случил за време на редовни теренски операции, токму на Меѓународниот ден на мирот. Војската веднаш активираше хеликоптери за итна медицинска евакуација кон најблиските болници.

Двајца од настраданите војници со хеликоптер веднаш се префрлени во воена болница. За третиот војник медицинските тимови организираа комбиниран транспорт. Најпрво со теренско возило го превезоа до безбедна точка за слетување, од каде што со друг хеликоптер беше упатен на интензивна нега. Воениот врв во Сеул засега не соопштува официјални детали за степенот на телесните повреди, но извори од јужнокорејскиот санитет наведуваат дека станува збор за тешки трауми на екстремитетите предизвикани од силна детонација.

Детонацијата одекнала јужно од воената демаркациона линија, длабоко во појасот широк четири километри што го дели Корејскиот Полуостров. Оваа зона е формирана по завршувањето на борбите во Корејската војна во 1953 година. Бидејќи војната заврши само со примирје, а не и со формален мировен договор, двете држави правно сè уште се во воена состојба. Трасата долж демаркационата линија со децении важи за една од најгусто минираните територии на планетата, каде што дождовите и ерозијата на земјиштето редовно ги поместуваат старите експлозивни направи.

Тензиите на теренот дополнително се заострија откако севернокорејската армија пролетва почна масовно да ја засилува граничната линија. Воените извештаи регистрираат дека силите на Ким Џонг Ун со месеци интензивно поставуваат нови мински полиња, градат противтенковски бариери и креваат високи заштитни огради. Дополнителен ризик носат сезонските поплави, кои често откопуваат и носат нагазни мини преку граничните реки директно кон јужнокорејските патролни патеки.