Американскиот милијардер Elon Musk постигна спогодба со американската Комисија за хартии од вредност (SEC) во долгогодишниот спор поврзан со купувањето на Твитер, денес познат како X.
Според договорот, фонд поврзан со Маск ќе плати казна од 1,5 милиони долари, без притоа да признае вина за обвинувањата.
Случајот се однесува на наводно доцнење од 11 дена во пријавувањето на неговиот удел во Твитер во 2022 година. Американските регулатори тврдат дека токму тоа доцнење му овозможило на Маск да купува акции по пониски цени пред јавноста да дознае колкав удел поседува во компанијата.
Според SEC, Маск подоцна го зголемил уделот на повеќе од девет проценти, по што следувало и целосното преземање на платформата во зделка вредна околу 44 милијарди долари.
Неговиот адвокат Алекс Спиро изјавил дека со оваа спогодба конечно се затвора случајот и дека Маск од почеток тврдел оти не направил намерен прекршок.
Ова не е прв судир меѓу Маск и американските регулатори. Уште во 2018 година, SEC го обвини за измама со хартии од вредност поради објави на Твитер поврзани со Тесла, по што тој тогаш плати 20 милиони долари казна и се повлече од функцијата претседател на компанијата.
Случајот повторно ја отвори дебатата за влијанието на милијардерите врз финансиските пазари и улогата на социјалните мрежи во движењето на вредноста на акциите.
