Принцот Хари и Меган Маркл планираат подолг престој во Велика Британија од оваа есен, но нема да се вратат како активни членови на британското кралско семејство, пренесува „Еуроњуз“, повикувајќи се на извори блиски до двојката. Нивните деца, принцот Арчи (7) и принцезата Лилибет (5), веќе се запишани во училишта во Велика Британија и треба да започнат со настава во септември.

Семејството планира да живее во приватна, некралска резиденција надвор од Лондон, но ќе го задржи својот дом во Монтесито, Калифорнија, како и имотот за одмор во Португалија. Веста прв ја објави „Дејли телеграф“. Запрашан за извештаите на настан во Вашингтон, Хари кратко одговорил: „Немам што да кажам.“

Хари сака помирување со семејството

Хари и Меган ги напуштија кралските должности и се преселија во Калифорнија пред повеќе од шест години, каде што започнаа да заработуваат преку комерцијални договори, меѓу другото со „Нетфликс“ и „Спотифај“.

Односите со остатокот од кралското семејство оттогаш се сериозно нарушени. Сепак, во последниот период Хари отворено зборува за желбата за помирување со семејството, особено за да може да поминува повеќе време со својот татко, кралот Чарлс III. Кралот во моментов се лекува од неоткриена форма на рак.

Според извори блиски до парот, Чарлс бил информиран за плановите на Хари и Меган во неделата. Двојката последен пат ја посети Велика Британија минатиот месец. Бакингемската палата не ги коментира шпекулациите поврзани со членови на кралското семејство кои повеќе не извршуваат официјални должности, додека претставник на Хари и Меган одбил да даде коментар.

Меган ќе ја води компанијата од Британија

Според извор близок до двојката, Меган ќе продолжи да ја води својата компанија „As Ever“ од Велика Британија. Хари, пак, ќе може да поминува повеќе време со своите добротворни организации кои работат во Британија.

Враќањето се случува по години на остри несогласувања со кралското семејство. Во интервјуа и во мемоарите „Spare“, Хари и Меган зборуваа за причините поради кои го напуштиле кралскиот живот и упатија сериозни критики кон дворските службеници и членовите на семејството. Дополнителна тензија создаде и долгогодишната правна битка на Хари со британските таблоиди, како и спорот со британската влада околу полициското обезбедување за него и неговото семејство при престојот во земјата.

По губењето на судскиот спор околу безбедноста, Хари изјави дека сака да ги обнови односите со семејството.

„Би сакал помирување со моето семејство. Нема повеќе смисла да продолжиме да се бориме. Не знам уште колку време му останува на татко ми“, изјави тој.

Сега, со враќањето во Британија и со децата кои треба да започнат училиште таму, се отвора ново поглавје за семејството Сасекс.