Општинските служби на Полигирос на грчкиот полуостров Халкидики отстранија повеќе од 170 чадори и друга опрема за плажа што биле трајно поставени на јавен простор на плажата Каливес. Локалните власти потврдија дека акцијата е дел од континуираните контроли за ослободување на крајбрежјето и овозможување непречен пристап до морето за сите посетители.
Инспекциските служби и комуналните работници интервенираа на крајбрежниот појас каде што неовластено беа бетонирани или забиени чадори со кои со денови се резервираа најатрактивните места на песокот. Со оваа мерка општината испрати јасна порака дека плажите се јавно добро и не смеат да се претвораат во приватни зони за поединци.
Локалната самоуправа истакна дека секој граѓанин, жител или турист мора да има можност слободно да избере каде ќе се смести покрај водата без притисок од узурпирани локации. Заменик-градоначалникот за секојдневни прашања на општина Полигирос, Василис Фардојанис, посочи дека целта на акциите е еднаков третман за сите туристи, а не само за оние кои имаат имоти во првиот ред до брегот.
Според него, јавниот простор им припаѓа на сите и никој нема законско право со денови да зафаќа делови од плажата со сопствена опрема додека не е присутен на песокот. Ваквите засилени контроли доаѓаат по бројните поплаки од капачи кои со години се соочуваа со оневозможен пристап до слободните делови од брегот.
Халкидики е меѓу најпосетуваните дестинации за летувалците од Македонија, кои често летуваат токму во селата и крајбрежните места под јурисдикција на општина Полигирос и соседните региони. Со оглед на тоа што туристичката сезона е во полн ек, надлежните најавуваат дека ваквите вонредни инспекции ќе продолжат долж целото крајбрежје.
За македонските граѓани кои патуваат со сопствена опрема, ова значи дека оставањето чадори, лежалки и шатори преку ноќ или во текот на целиот ден без присуство на сопствениците повеќе нема да се толерира. Секоја опрема затекната на јавен простор ќе биде веднаш конфискувана од општинските служби без претходно предупредување.
