Три дена пред вонредните парламентарни избори во Србија, центарот на Белград е исполнет со непрегледни колони луѓе.

Под слоганот „Победата те повикува“, студентското движење вечерва, 22 октомври, го организира својот последен голем собир пред изборите закажани за недела, 25 октомври.

Според известувањата на телевизијата Н1, колони граѓани се движеле кон Славија од Нов Белград, Земун, Чукарица, Студентскиот плоштад, Техничките факултети и Автокоманда. Од повеќе делови на Србија во текот на денот пристигнувале и организирани колони возила.

Сликите од воздух покажуваат голема маса луѓе во центарот на Белград, а новинарите на Н1 јавуваат дека пристапот до Славија од одредени улици е речиси невозможен поради бројноста на присутните.

„Потсетува на 15 март и мириса на слобода“, изјавил еден од учесниците за Н1, споредувајќи го вечерашниот собир со големите студентски протести од минатата година.

Друг учесник оценил дека вечерва има дури и повеќе луѓе отколку на 15 март, иако засега нема независно потврдена процена за бројот на присутни.

Говорите на собирот започнаа околу 18:38 часот.

На вечерашниот собир му претходеа повеќедневни студентски маршеви од различни делови на Србија. Студенти пешачеа од Заечар, Ваљево, Шабац, Горњи Милановац и Нови Сад, а синоќа во Белград им беше приреден масовен пречек.

Студентското движење, кое израсна од протестите по трагедијата на железничката станица во Нови Сад во ноември 2024 година, сега за првпат влегува во директна парламентарна изборна трка.

Истовремено со студентскиот собир, Српската напредна партија организира предизборен настан во спортската сала „Ранко Жеравица“ во Нов Белград.

Предвремените парламентарни избори на 25 октомври ќе бидат значаен политички тест за владејачката структура и за студентското движење, кое по речиси две години протести го пренесе своето дејствување и на изборниот терен.