Дваесетина граѓани од Преспа, Охрид и Битола се вклучија во организирано набљудување птици кај месноста Сирхан, со директен поглед кон Паркот на природата „Езерани“, соопшти Македонското еколошко друштво. Теренската активност го означи почетокот на јавната манифестација „Мојот дел од природата“, чија цел е практично вклучување на јавноста во научни методи за следење на животната средина.

Заедно со стручните истражувачи, учесниците совладуваа техники за препознавање и регистрирање на видовите на терен. Присуството, бројноста и сезонското движење на птиците претставуваат клучни биоиндикатори преку кои научниците ја мерат стабилноста на чувствителниот преспански екосистем.

Еколошките активности на терен продолжуваат со граѓански мониторинг на копнените желки, додека централниот настан е закажан за попладневните часови на градскиот плоштад во Ресен. Настанот нуди едукативна програма отворена за јавноста со цел зајакнување на локалната свест за зачувување на природните вредности.

Оваа иницијатива е дел од поширокиот проект „Иницијатива за зелена и сина Преспа“, насочен кон заштита на регионот преку истражување и едукација. Проектот се спроведува со финансиска поддршка од Европската Унија преку програмата „ЕУ за Преспа“ и кофинансирање од Фондот за природа „Преспа – Охрид“ (ПОНТ).

Во спроведувањето на активностите учествуваат Македонското еколошко друштво, Општина Ресен и Националниот парк „Галичица“, во прекугранично партнерство со еколошки организации од Грција и Албанија, како и со институционална поддршка од Министерството за животна средина и просторно планирање и Националниот парк „Пелистер“.