Google ја проширува end-to-end енкрипцијата во Gmail и на мобилните уреди, овозможувајќи корисниците да испраќаат и примаат шифрирани пораки директно од Android и iOS апликациите.
Со оваа промена, корисниците за првпат ќе можат да читаат и пишуваат енкриптирани мејлови без користење дополнителни алатки или посебни платформи. Шифрираните пораки ќе пристигнуваат во inbox на ист начин како и обичните мејлови, без потреба од посебна конфигурација за секојдневна употреба.
Новата функција овозможува испраќање енкриптирани пораки до било кој примач, без разлика дали користи Gmail или друга е-пошта услуга. Доколку примачот има Gmail, пораката се прикажува како стандардна мејл нишка, додека корисниците без Gmail ќе можат безбедно да ја читаат и да одговорат преку веб-прелистувач.
Google наведува дека оваа опција е особено наменета за организации што работат со чувствителни податоци, бидејќи овозможува комуникација со повисоко ниво на безбедност, усогласена со регулативите и барањата за заштита на податоци.
За користење на функцијата, корисниците треба само да ја активираат опцијата за енкрипција при испраќање на пораката, додека администраторите во организациите треба претходно да ја овозможат поддршката за мобилни уреди преку администраторската конзола.
Оваа функционалност засега е достапна за деловни корисници, односно за оние што користат Enterprise пакети со дополнителни безбедносни опции.
