Германскиот сојузен финансиски регулатор „BaFin“ отвори истрага против регионалната банка „Volksbank Köln Bonn“ поради сомнителен заем со кој во 2021 година било финансирано купувањето на познатиот бордел „Pascha“ во Келн. Властите бараат детални информации за трансакцијата по сомнежите дека високи функционери во банката можеби лично профитирале од одобрувањето на овие средства.

Банката „Volksbank Köln Bonn“ му одобрила кредит на кинескиот инвеститор Ху Јинг со цел купување на комплексот со девет ката, кој важи за еден од најголемите објекти од ваков тип во Европа. Иако проституцијата во Германија е целосно легализирана дејност, фокусот на истражителите не е самата природа на бизнисот, туку начинот на кој се донесувале одлуките во банката.

Истрагата на финансискиот регулатор се фокусира на информациите дека на членот на управата, Јирген Нојтгенс, му била исплатена неовластена провизија поврзана со одобрувањето на кредитот. Банката уште во текот на јули ангажираше независна адвокатска канцеларија за да ја преиспита целата постапка и да утврди дали имало злоупотреба на службената положба.

Адвокатот на осомничениот банкарски функционер соопшти дека неговиот клиент ги отфрла сите обвинувања за какви било незаконски дејствија. Нојтгенс, кој е дел од раководството на банката од 2018 година и е задолжен за корпоративни клиенти и управување со ризницата, во моментов е на принуден одмор сè додека не заврши целосната правна проверка.