Европската комисија на 21 октомври покрена официјална постапка против платформата Букинг.ком (Booking.com) за да утврди дали таа ги исполнува обврските од Законот за дигитални услуги (ДСА). Истрагата опфаќа лажни огласи за сместување, фишинг-измами во кои се злоупотребуваат податоци за резервации, како и транспарентноста на платеното истакнување понуди во резултатите од пребарувањето.

Комисијата ќе испитува дали Букинг.ком ефикасно ги проценувал и намалувал ризиците поврзани со огласи за непостоечки сместувачки објекти и други понуди што можат да ги доведат корисниците во заблуда.

Ќе се проверува и на кој начин платформата ги споделува податоците за гостите и резервациите со давателите на сместување, како и дали има соодветни механизми за спречување злоупотреба на тие информации во фишинг-напади и обиди за измамнички наплати.

Третата област на истрагата се однесува на огласите преку кои давателите на сместување можат да платат повисока провизија за да се појават повисоко во резултатите од пребарувањето. Комисијата сака да утврди дали ваквите понуди се јасно означени како реклами и дали корисниците можат да дознаат кој плаќа за нивното истакнување и зошто им се прикажуваат.

Дополнителни обврски за големите онлајн-платформи

Букинг.ком во 2023 година беше прогласен за многу голема онлајн-платформа според Законот за дигитални услуги. Поради тоа, подлежи на дополнителни обврски за процена и намалување на системските ризици поврзани со неговото работење.

Европската комисија ќе продолжи да собира докази, а постапката може да доведе до мерки со кои од платформата ќе се бара да ги усогласи своите практики со прописите или до одлука дека дошло до нивно прекршување.

Сепак, отворањето истрага не значи дека Букинг.ком веќе е прогласен за одговорен за прекршување на правилата.

Во постапката Европската комисија соработува со холандското тело надлежно за заштита на потрошувачите и за заштита на конкуренцијата.