Германската автомобилска индустрија продолжува да ја намалува работната сила. На крајот од првата половина на 2026 година, во секторот биле вработени 691.500 луѓе, што е за 42.300 помалку во споредба со истиот период минатата година.

Според податоците на германскиот завод за статистика Destatis, тоа претставува пад од 5,8 проценти на годишно ниво.

Најниска вработеност од 2005 година

Со ова, бројот на вработени во германската автомобилска индустрија паднал на најниско ниво од 2005 година.

Податоците покажуваат дека притисокот врз секторот продолжува, во период кога европската автомобилска индустрија се соочува со структурни промени, трансформација кон електрични возила и силна меѓународна конкуренција.

Најголем пад кај производителите на делови

Најголем пад на бројот на вработени е забележан кај производителите на автомобилски делови и опрема.

Во овој сегмент бројот на вработени се намалил за 7,6 проценти на годишно ниво и изнесувал 219.500 лица.

Овој дел од индустријата е особено чувствителен на промените во производството, бидејќи добавувачите директно зависат од нарачките на големите автомобилски компании.