Селекторот на Белгија, Руди Гарсија, смета дека една скапа грешка го решила четвртфиналниот дуел со Шпанија на Светското првенство, кој неговата селекција го загуби со 2:1. Шпанија поведе преку Фабијан Руиз во 30. минута, Белгија израмни со голот на Шарл де Кетеларе во 41. минута, но Микел Мерино во 88. минута го постигна победничкиот гол и ја однесе „црвената фурија“ во полуфиналето, каде ќе игра против Франција.

Гарсија истакна дека неговата репрезентација била погодена од низа неповолни околности.

„Тоа беше натпревар во кој ништо не одеше како што посакувавме. Јури Тилеманс отпадна пред почетокот, Тибо Куртоа се повреди за време на мечот, а ниту Кевин Де Брујне не можеше да го издржи натпреварот до крај. Сепак, бевме подготвени и за продолженија и успеавме да ја разнишаме Шпанија. По нашиот израмнувачки гол, почувствував дека почнаа да се сомневаат во себе“, изјави белгискиот селектор.

Тој посочи дека натпреварите од ваков калибар ги решаваат ситниците.

„Ваквите натпревари ги одлучуваат детали. Ако сакате да победите, не смеете да му подарите гол на противникот. Младите играчи ќе извлечат поука од ова. Жал ми е што нашето учество заврши, но горд сум на моите фудбалери. Покажавме дека Белгија и понатаму е голема фудбалска нација“, нагласи Гарсија.

И покрај елиминацијата, тој смета дека тимот успеал повторно да ја врати довербата кај навивачите.

„Се надевам дека повторно им дадовме причина на Белгијците да сонуваат. Ги видов реакциите на навивачите по победата над САД и тоа многу ме израдува. Навивачите повторно се со репрезентацијата, а тоа е исклучително важно“, порача Гарсија.