Европа би можела да се соочи со сериозни последици во снабдувањето со енергенси доколку продолжи ескалацијата на конфликтот меѓу САД и Иран, покажува најновата анализа на Ројтерс. Иако европските земји преземаат мерки за стабилизирање на пазарот, регионот останува најизложен на можни прекини во испораките на нафта и гориво.

Во последните недели европските држави го зголемија увозот на авионско гориво од САД и Азија, а домашните рафинерии го засилија производството за да обезбедат непречено снабдување на аеродромите. Дополнително, дел од земјите ги користат и постојните резерви.

Сепак, Европа останува особено ранлива поради намалениот број активни рафинерии во изминатите години, што ја прави зависна од испораките од Блискиот Исток кои минуваат низ Ормутскиот Теснец. Најизложени на ризик се Велика Британија, Франција и Германија.

Според проценките на консултантската компанија „Energy Aspects“, во текот на третиот квартал Европа би можела да се соочи со недостиг од речиси 600.000 барели нафта дневно. Анализата покажува и дека европските резерви покриваат помалку од 30 дена од побарувачката, што е најниско ниво меѓу големите светски пазари за авионско гориво.

За споредба, САД располагаат со дневен вишок од околу 116.000 барели, додека азиско-пацифичкиот регион има вишок од приближно 425.000 барели дневно.

Европската комисија предупредува дека состојбата може дополнително да се влоши доколку продолжат нарушувањата во снабдувањето со енергенси. Зависноста од транспортот низ Ормутскиот Теснец, преку кој поминува значителен дел од светската трговија со нафта, претставува сè поголем ризик во услови на засилени тензии во регионот.