Европскиот парламент усвои нова реформа за правата на патниците во воздушниот сообраќај, со која се воведуваат значајни промени за сите што патуваат со авион во рамките на Европската Унија. Новите правила предвидуваат поголема транспарентност при купувањето билети, полесно остварување на правото на надомест за доцнење на летови, како и бесплатна можност родителите да седат до своите деца во авионот.

Реформата беше поддржана од големо мнозинство европратеници – 646 гласаа „за“, а сега треба формално да биде одобрена од земјите членки на ЕУ. Откако ќе стапи во сила, авиокомпаниите ќе имаат 12 месеци да ги прилагодат своите правила.

Родителите повеќе нема да плаќаат за да седат до децата

Една од најзначајните промени се однесува на семејствата кои патуваат со деца. Според новите правила, родителите ќе можат бесплатно да резервираат седишта веднаш до своите деца. Досега многу авиокомпании, особено нискобуџетните превозници, наплаќаа дополнителни такси за избор на места, што често ги принудуваше семејствата дополнително да плаќаат за да патуваат заедно.

Со новата регулатива, Европската Унија сака да стави крај на практиката семејствата да се распоредуваат во различни делови од авионот доколку не платат дополнителна услуга.

Крај на скриените трошоци при купување авионски билет

Новите правила воведуваат построги барања за прикажување на цените. Авиокомпаниите ќе мора однапред јасно да ги наведат сите трошоци поврзани со патувањето, за патниците да знаат колку навистина ќе платат уште пред да ја завршат резервацијата.

Компаниите ќе треба да понудат јасна разлика меѓу основната цена на билетот и дополнителните услуги, како што се избор на седиште, багаж или други додатоци.

Полесно барање обесштетување за доцнење на летови

Основните правила за компензација при доцнење остануваат исти. Патниците ќе имаат право на финансиски надомест доколку летот доцни три часа или повеќе, но само ако причината е поврзана со авиокомпанијата.

Висината на надоместот зависи од должината на летот:

• 250 евра за летови до 1.500 километри;
• 400 евра за летови до 3.500 километри;
• 600 евра за летови над 3.500 километри.

Правото на обесштетување важи и за откажани летови доколку авиокомпанијата го откажала патувањето помалку од две недели пред планираното полетување.

Авиокомпаниите ќе мора да ги информираат патниците за нивните права

Една од новините е обврската на превозниците активно да ги информираат патниците за можноста за компензација. Авиокомпаниите ќе мора најдоцна четири дена по пристигнувањето да им дадат информации каде и како можат да поднесат барање за надомест.

По приемот на барањето, компаниите ќе имаат 30 дена да ја исплатат сумата или детално да образложат зошто барањето е одбиено.

Кога патниците немаат право на надомест?

Компензација нема да се исплаќа во случаи на таканаречени вонредни околности.

Во оваа категорија спаѓаат: природни катастрофи; сериозни безбедносни ризици; непредвидени ситуации надвор од контролата на авиокомпанијата.

Сепак, штрајк на вработените во самата авиокомпанија нема автоматски да се смета за вонредна околност. Исто така, технички проблеми со авионот најчесто нема да бидат доволна причина компанијата да избегне исплата на надомест.

Што се менува за рачниот багаж?

Европскиот парламент не го прифати предлогот за воведување единствени димензии за рачен багаж кај сите авиокомпании.

Сепак, новите правила бараат компаниите при купувањето билет јасно да покажат дали цената вклучува рачен багаж или станува збор за дополнителна услуга што треба да се плати.

Што ако патникот го пропушти летот?

Ако патникот самиот го пропушти летот, нема автоматско право на обесштетување.

Но, доколку има повратен билет и не го искористил првиот дел од патувањето, ќе може да побара враќање на средствата за неискористениот повратен сегмент.

Новата регулатива ќе се однесува на:

• летови што ги извршуваат авиокомпании од Европската Унија;
• летови на неевропски авиокомпании кои полетуваат од аеродроми во ЕУ.

Европските институции со реформата сакаат да ја зголемат довербата на патниците и да создадат пофер систем во кој цените ќе бидат транспарентни, а правата на патниците полесно остварливи. Новите правила доаѓаат во период кога бројот на воздушни патувања во Европа повторно расте, но со тоа растат и поплаките за доцнења, откажувања и дополнителни трошоци при купување билети.