Најновото истражување на научниците од Кембриџ открива дека масовните патувања на навивачите низ Северна Америка оставија сериозни последици врз атмосферата. Анализата покажува дека транспортот на публиката е убедливо најголемиот извор на штетни емисии при големите спортски настани и музички турнеи, што значи дека организаторите досега се фокусирале на погрешни еколошки решенија.

Податоците се застрашувачки: за помалку од два месеци, проширеното Светското првенство со 48 репрезентации генерираше количество на јаглерод диоксид колку што некои земји испуштаат за цела година. Турнирот достигна бројка од околу 4,23 милиони тони јаглеродни емисии, што е речиси еднакво на годишното загадување на цел Исланд. Од нив, дури три милиони тони доаѓаат исклучиво од авионските летови на навивачите.

Слична е ситуацијата и во музичката индустрија. За време на турнејата на Taylor Swift во 2024 година, само патувањата со нејзиниот приватен авион испуштија повеќе јаглерод диоксид од годишното загадување на 120 стандардни автомобили. Наспроти ова, бендот Coldplay покажа дека промената е можна. Преку својата апликација, тие ги мотивираа фановите да избираат еколошки транспорт и им понудија попусти за производи, со што емисиите од патувањата се намалија за неверојатни 48 проценти.

Наместо да се потпираат на купување јаглеродни кредити, кои често се само маркетинг трик за прикривање на реалното загадување, организаторите мора да преземат одговорност. Кембриџ предлага конкретни мерки: обезбедување евтини билети за воз, стимулации за заедничко патување и избор на локации кои не бараат долги прекуокеански летови.